Кишинёвдан ўзини ўзи республика деб эълон қилган Приднестрове Молдова Республикаси (ПМР) жойлашган ва унинг назорати остида бўлмаган Днестр чап қирғоғи истеъмолчилари томонидан фойдаланилган газ учун қарзни тўлаб қўйишни талаб қилиш адолатсизлик ва ноинсофликдир. Бу ҳақда Молдованинг сайланган президенти Майя Санду «РБК» телеканалига берган интервьюсида айтиб ўтди.
«Ўнг қирғоқда бизнинг ‘Газпром’дан қарзимиз деярли йўқ, чунки биз тўлаяпмиз ва барча йиллар давомида тўлаб келганмиз. Чап қирғоқда эса газ учун пул тўланмаган ва у ердаги қарз жуда катта. Ва албатта, биз, ўнг қирғоқдагилардан тўлашимизни кутиш керак эмас. Бу инсофдан эмас, адолатдан эмас», — деди у.
Сандунинг сўзларига кўра, умумий қарз миқдори ҳозир қарийб 7,5 миллиард долларга тенг ва Днестрнинг ўнг қирғоғидаги одамлар чап қирғоқдагилар газга пул тўламаётганидан бошқа нарса ҳақида гапирмайди.
«Кейин эса ‘Приднестровенинг газ учун улкан қарзини ким тўлайди?’ деган гаплар бошланади… Бу катта муаммо, лекин уни ҳал қилиш керак», — дея таъкидлади Санду.
Молдова президенти сайловининг иккинчи босқичида ғалаба қозонганидан кейин кўп ўтмай, Санду ПМРда газ учун тўпланиб қолган қарзларни тан олмаслигини айтган эди.
«Ўнг қирғоқдаги Молдова газ учун, шу жумладан, Россия гази учун пул тўлайди. Шунинг учун ҳатто Приднестрове газни бепул ишлатиб, қарз Молдованинг бўйнида, деяётган бўлса ҳам, бу ундай эмас. Биз ҳеч қачон бу қарзни тан олмаймиз. Бу Приднестрове «ҳукумати»нинг қарзи, биздан ҳеч ким бу газни олиш-олмаслигимиз ҳақида сўраган эмас», — деган эди Санду «Европейская Правда» нашрига берган интервьюсида.
2020 йилнинг учинчи чораги учун ҳисоботда «Газпром» Россия Савдо-саноат палатаси ҳузуридаги Халқаро тижорат арбитраж суди унинг «Молдовагаз» (компания акцияларининг 50 фоизи «Газпром»га тегишли)дан 2017 йилда етказилган газ учун қарздорликни сўндириш учун 246 миллион доллардан зиёд суммани ундириб олиш ҳақидаги даъвосини қондирганини маълум қилди. Ўша ҳужжатнинг ўзида айтилишича, 2011—2019 йилларда Молдованинг қарздорлиги Приднестрове истеъмолчиларининг тўламай юришлари туфайли ўсган.
«Молдовагаз» сайтидаги ҳисоботга кўра, 2019 йил 31 декабрь ҳолатига кўра, компаниянинг «Газпром»дан 6,3 миллиард доллардан зиёд, «Газпром»га боғлиқ «Faktoring Finans» компаниясидан эса яна 1,1 миллиард доллардан ортиқ қарзи бўлган.
Аввалроқ Майя Санду Молдовадаги Россия тинчликпарварларини ЕХҲТнинг ноҳарбий миссиясига алмаштиришни таклиф қилган эди.
Майя Санду 15 ноябрда президентлик сайловларининг иккинчи турида 57,72 фоиз овоз олган, амалдаги президент Игор Додон эса 42,28 фоиз овоз тўплаган. Сайловолди кампания вақтида Санду Европа Иттифоқи сиёсатини жорий этишни таклиф қилганди.
Молдовада президентлик сайловларининг биринчи тури 2020 йил 1 ноябрь куни бўлиб ўтган. Унда Додон 32,74 фоиз натижа билан Сандудан ортда қолган эди (унда 35,96 фоиз овоз).
Молдовада президентлик сайловларини ўтказиш 2019 йилнинг июнида республиканинг Конституциявий суди Додонни депутатлар сўрови бўйича лавозимидан четлаштиргач белгиланган эди. Бу 2016 йили Додон президент этиб сайланганидан буён олтинчи маротаба четлаштириш ҳисобланади. Россия президенти Владимир Путин 16 ноябрда Майя Сандуни Молдова президенти сайловларидаги ғалабаси билан табриклаган.
Изоҳ (0)