Rossiya ilm-fan va ta’lim vazirligi mamlakatdagi oliy ta’lim muassasalarida tahsil olayotgan xorijlik talabalarning masofaviy ta’lim shakliga o‘tilgani uchun oliygohlardan chetlashtirilishi haqida tarqalgan xabarlarni inkor etdi, deb yozmoqda “Interfaks”.
“Ta’limning masofaviy shakliga o‘tilishi xorijlik talabalarning OTMdan chetlashtirilishi sabab bo‘lmaydi”, – deya bayonot bergan vazirlik.
Avvalroq pandemiya sabab Rossiya chegaralarining yopilganligi va boshqa mamlakatlardan kelgan talabalar federatsiyaga kira olmayotgani tufayli safdan chiqarilishi haqida xabarlar tarqalgandi.
“Oliygohlardagi budjet o‘rinlari karantin cheklovlari tufayli Rossiyaga kela olmagan va aloqa sifatining yomonligi oqibatida masofadan ta’lim olishga qodir bo‘lmagan talabalar uchun saqlab turiladi”, – deyiladi vazirlik tushuntirishida.
Bundan tashqari vazirlik tomonidan xorijdan mamlakatga kela olmagan talablarning yashash sharoitlariga ko‘mak berish maqsadida ular yashaydigan hududlardagi oliygohlar filiallarida ish o‘rinlari tashkil qilish masalalari ham o‘rganilmoqda.
Shuningdek, vazirlik o‘tgan vaqt davomida talabalarning darslarda qatnasha olmaganligi sababli o‘qishdan chetlatilgani haqidagi shikoyat yoxud murojaatlar kelib tushmaganini qayd etgan.
Moskva va Sankt Peterburgda koronavirus epidemiyasi bog‘liq noxush vaziyat tufayli 13-noyabrdan boshlab ta’limning masofaviy shakliga o‘tilgan. Rossiya OTMlarida tahsil olayotgan xorijlik talabalar bahorda yurtiga ketganidan keyin, chegaralar qayta yopilganligi sababli mamlakat hududiga kira olmagan. Vazirlik xorijliklar uchun masofaviy texnologiyalar asosida o‘qitish tashkil qilinishini bildirgan.
2020-yil 29-noyabr holatiga ko‘ra butun dunyoda koronavirusga chalinganlar soni 62 milliondan oshgan, pandemiya boshidan buyon 1,4 million kishi koronavirusdan vafot etgan. Rossiyada 27-noyabrda bir sutkada 27 543 kishida COVID-19 aniqlangan, bir kun avval 26-noyabr kuni 25 487 kishida koronavirus aniqlanib, kunlik kasallanishlar soni bo‘yicha yuqori ko‘rsatkich qayd etilgandi.
Izoh (0)