O‘zbekiston tashqi ishlar vaziri Abdulaziz Komilov va AQSh davlat kotibi Maykl Pompeo 30-noyabr, dushanba kuni telefon orqali muloqot qildi. Bu haqda AQSh Davlat departamenti sayti orqali xabar berildi.
“Davlat kotibi Maykl Pompeo AQSh O‘zbekiston suvereniteti, hududiy yaxlitligi va mustaqilligini, shuningdek, Prezident Shavkat Mirziyoyevning islohotlar dasturini doimiy ravishda qo‘llab-quvvatlashini tasdiqladi”, — deyiladi xabarda.
O‘zbekiston tashqi ishlar vaziri va AQSh davlat kotibi inson huquqlari sohasidagi islohotlar jarayoni, jumladan, din erkinligini kengaytirish, odam savdosiga qarshi kurash, fuqarolik jamiyati va jurnalistlar uchun maydonni kengaytirish masalalarini muhokama qilgan. Shuningdek, tomonlar AQSh eksportchilari va investorlari uchun imkoniyatlarni muhokama qilgan, chunki O‘zbekiston bozor siyosati va xususiylashtirish jarayonini amalga oshirmoqda.
Abdulaziz Komilov va Maykl Pompeo O‘zbekiston va AQSh o‘rtasidagi sheriklik hamda strategik hamkorlik haqida fikr almashib, har ikki davlat hukumatining yillik ikki tomonlama siyosiy maslahatlashuvlarni strategik sheriklik bo‘yicha muloqot shakliga aylantirish to‘g‘risidagi qarorini yuqori baholagan.
Avvalroq Abdulaziz Komilov AQShda o‘zbekistonlik Saidahmad Arslanovga “Shuhrat” medali va elchixonaning birinchi kotibi Faxriddin Mo‘minovga “Mehr-saxovat” ko‘krak nishonini tantanali ravishda topshirgani to‘g‘risida xabar berilgandi.
Eslatib o‘tamiz, Abdulaziz Komilov boshchiligidagi O‘zbekiston delegatsiyasi 15—22-noyabr kunlari AQShga tashrif buyurgan edi. Tashrif davomida tashqi ishlar vaziri Pentagon rahbari vazifasini bajaruvchi Kristofer Miller bilan uchrashdi.
Delegatsiya 20-noyabr kuni O‘zbekiston—AQSh siyosiy maslahatlashuvlarining sakkizinchi raundida ishtirok etdi. Shuningdek, Abdulaziz Komilov AQShdagi o‘zbekistonliklarga davlat mukofotlarini topshirdi.
Izoh (0)