Ўзбекистон ташқи ишлар вазири Абдулазиз Комилов ва АҚШ давлат котиби Майкл Помпео 30 ноябрь, душанба куни телефон орқали мулоқот қилди. Бу ҳақда АҚШ Давлат департаменти сайти орқали хабар берилди.
«Давлат котиби Майкл Помпео АҚШ Ўзбекистон суверенитети, ҳудудий яхлитлиги ва мустақиллигини, шунингдек, Президент Шавкат Мирзиёевнинг ислоҳотлар дастурини доимий равишда қўллаб-қувватлашини тасдиқлади», — дейилади хабарда.
Ўзбекистон ташқи ишлар вазири ва АҚШ давлат котиби инсон ҳуқуқлари соҳасидаги ислоҳотлар жараёни, жумладан, дин эркинлигини кенгайтириш, одам савдосига қарши кураш, фуқаролик жамияти ва журналистлар учун майдонни кенгайтириш масалаларини муҳокама қилган. Шунингдек, томонлар АҚШ экспортчилари ва инвесторлари учун имкониятларни муҳокама қилган, чунки Ўзбекистон бозор сиёсати ва хусусийлаштириш жараёнини амалга оширмоқда.
Абдулазиз Комилов ва Майкл Помпео Ўзбекистон ва АҚШ ўртасидаги шериклик ҳамда стратегик ҳамкорлик ҳақида фикр алмашиб, ҳар икки давлат ҳукуматининг йиллик икки томонлама сиёсий маслаҳатлашувларни стратегик шериклик бўйича мулоқот шаклига айлантириш тўғрисидаги қарорини юқори баҳолаган.
Аввалроқ Абдулазиз Комилов АҚШда ўзбекистонлик Саидаҳмад Арслановга «Шуҳрат» медали ва элчихонанинг биринчи котиби Фахриддин Мўминовга «Меҳр-саховат» кўкрак нишонини тантанали равишда топширгани тўғрисида хабар берилганди.
Эслатиб ўтамиз, Абдулазиз Комилов бошчилигидаги Ўзбекистон делегацияси 15—22 ноябрь кунлари АҚШга ташриф буюрган эди. Ташриф давомида ташқи ишлар вазири Пентагон раҳбари вазифасини бажарувчи Кристофер Миллер билан учрашди.
Делегация 20 ноябрь куни Ўзбекистон—АҚШ сиёсий маслаҳатлашувларининг саккизинчи раундида иштирок этди. Шунингдек, Абдулазиз Комилов АҚШдаги ўзбекистонликларга давлат мукофотларини топширди.
Изоҳ (0)