Ўзбекистон футбол ассоциациясининг футбол фаолиятини назорат қилиш махсус инспекцияси Суперлига ва Про-Лига учрашувларида коррупцион ҳолатларни аниқлади. Бу ҳақида ташкилот расмий сайтида хабар берилди.
Қайд этилишича, бир қатор футбол ўйинларида учрашувга ёки унинг натижасига таъсир ўтказиш мақсадида келишувларда қатнашган бир қатор футбол ҳакамлари аниқланган.
ЎФА инспекцияси томонидан мазкур ҳолатга алоқадорликда гумон қилинган 10 нафардан ортиқ футбол ҳакамлари, профессионал футбол клубларининг мураббий ва расмий шахслари бўйича маълумотлар, тегишли футбол учрашувлари қайдномалари, инспекторларнинг футбол учрашувлари бўйича ҳисоботлари, ҳакамларнинг футбол фаолиятини ҳимоя қилиш тўғрисидаги декларациялари, тегишли футбол учрашувларидаги шубҳали эпизодлар акс этилган видеоматериаллар ЎФА Этика қўмитасига кўриб чиқиш учун тақдим этилган.
«Тақдим этилган маълумотлар бўйича 2020 йилнинг 17 ва 25 ноябрь кунлари ЎФА Этика қўмитасининг йиғилишлари бўлиб ўтган ва унда айбдорларга нисбатан тегишли тартибда жазо чоралари қўлланилган.
Уларга кўра:
- ФИФА, ОФК ҳаками Жасур Мухторов ЎФА интизом кодексининг 5.44 бандига асосан бир қатор футбол ўйинларида учрашувга ёки унинг натижасига таъсир ўтказиш мақсадида келишувларда қатнашгани учун 5 йил муддатга футбол билан боғлиқ ҳар қандай фаолиятдан четлатилди ҳамда 90 миллион сўм жаримага тортилди;
- ЎФА ҳаками Темур Тўхтасинов ЎФА интизом кодексининг 5.44 бандига асосан бир қатор футбол ўйинларида учрашувга ёки унинг натижасига таъсир ўтказиш мақсадида келишувларда қатнашгани учун 2021 йилги футбол мавсумида ҳакамлик қилишдан четлатилди ва 10 миллион сўм жаримага тортилди;
- ЎФА ҳаками Аскер Нажафалиев ҳакамларнинг футбол фаолиятини ҳимоя қилиш тўғрисидаги декларациясига асосан ЎФА футбол фаолиятини назорат қилиш махсус инспекцияси билан ҳамкорлик қилганлиги ва ОФК Ҳакамлар академиясида таҳсил олаётганлиги, таҳсил жараёнида энг яхши кўрсаткичларни қўрсатаётганлигини инобатга олиб, бироқ ЎФА интизом кодексининг 5.42 бандига асосан ПФЛ мусобақаларини ўтказиш билан боғлиқ реал фактларни бузиб кўрсатишга уринганлиги учун 2020 йил футбол мавсуми охиригача ҳакамлик қилишдан четлатилди ва 70 миллион сўм жаримага тортилди.
Мазкур қарор ЎФА томонидан расмий тарзда эълон қилинган кундан бошлаб кучга киради», — дейилади ЎФА баёнотида.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)