O‘zbekistonda 2021-yil davomida tabiiy gaz va elektr energiyasi iste’moli uchun tariflar oshirilmasligi belgilanmoqda. Bu haqda Oliy Majlis Qonunchilik palatasi deputati Rasul Kusherbayev ma’lum qildi.
Uning aytishicha, mazkur norma 2021-yil uchun mo‘ljallangan Davlat budjeti loyihasida qayd etilgan.
24-noyabr kuni Qonunchilik palatasining yalpi majlisida ishtirok etgan bosh vazir Abdulla Aripov ham buni tasdiqlab, bu aholi uchun yengillik yaratish va qo‘llab-quvvatlash yo‘lida qilinayotganligini bildirib o‘tgan.
“Umid qilamizki, bu sifatga ta’sir qilmaydi”, — deydi deputat.
Mavzuga doir: O‘zbekistonda 2021-yildan barcha iste’molchilar elektr energiyasi uchun to‘lovlarni oldindan amalga oshirishi mumkin
Davlat rahbari 26-oktabr kuni elektr energetikasi korxonalarini transformatsiya qilish bo‘yicha ustuvor vazifalar muhokamasi yuzasidan o‘tkazgan yig‘ilishda 4 ta davlat elektr energetikasi korxonasining moliyaviy modeli va biznes rejalarini ishlab chiqish bo‘yicha topshiriq bergandi.
Qayd etish joiz, so‘nggi bir haftada O‘zbekistonda havo haroratining keskin sovishi ortidan elektr va gaz ta’minotida jiddiy muammolar yuzaga kelmoqda. Xususan, To‘raqo‘rg‘on, Taxiatosh va Tallimarjon issiqlik energiya stansiyalarida ketma-ket avariyalar yuz bergani ma’lum bo‘ldi. Farg‘ona viloyatida elektr energiyasi ta’minotida 28 soatgacha uzilishlar kuzatilmoqda, xususan, viloyatning O‘zbekiston tumanida o‘n minglab aholi bir sutkadan ortiq elektr ta’minotisiz qolib ketdi. Kattaqo‘rg‘onda elektrsiz qolgan issiqxona bir kechada 35 ming dollar zarar ko‘rdi, qashqadaryolik tadbirkor uch kun elektrsiz qolgani sabab olti mingta tovug‘idan ayrildi.
Izoh (0)