Baxmaldagi Axborot-kutubxona markazi ochilishida o‘quvchi qizlarni sovuqda yupun kiyintirgan tadbir tashkilotchilariga ogohlantirish berildi, deya xabar bermoqda Baxmal tumani hokimligi.
Axborot-kutubxona markazi ochilish marosimi tasvirlangan suratlarda tuman hokimi Musa Anarboyev va boshqa mutasaddilar mavsumiy qalin kiyimda hamda ularning oldida havo sovuq bo‘lishiga qaramay, atlas kiyim kiygan qizchalar tasvirlangan. Ushbu holat ijtimoiy tarmoqlarda keskin noroziliklarga sabab bo‘ldi. Hokimlik mazkur holat yuzasidan quyidagicha izoh berdi.
“Baxmal tumanida 2020-yilning 20-noyabr kuni Axborot-kutubxona markazi ochilish marosimi bo‘lib o‘tgan. Tuman Axborot-kutubxona markazi tomonidan tashkil etilgan ochilish marosimiga tuman hokimi ishtirokchi sifatida taklif etilgan.
Kutubxona ochilishidan xabardor bo‘lgan kitobxonlar kutubxona fondi bilan tanishish uchun tashrif buyurgan.
Tuman hokimi yosh bolalar sovuq kunda yupan kiyinganini tadbirga tashrif buyurganidan keyin guvohi bo‘lgan. Havo sovuqligi bois ochilish marosimi tashqarida taxminan 5-6 daqiqa davom etgan.
Tadbir yakunlangach tuman hokimi tadbir tashkilotchilariga kichik yig‘ilish o‘tkazdi. Mazkur yig‘ilishda tuman hokimi tadbirni tashkiliy qismi nega aynan binoning ichida o‘tkazilmagani yuzasidan keskin munosabat bildirgan.
Kuni kecha ijtimoiy tarmoqlarda chiqarilgan e’tirozlar yuzasidan rasmdagi o‘quvchilar va ularning ota-onalari bilan suhbat jarayonida mazkur holatda farzandlarining uzoq vaqt tashqarida qolib ketmagani sababli e’tirozlari yo‘q ekanligi bildirilgan.
Tadbir tashkilotchilariga qonuniy tartibda o‘z xizmat vazifasini bajarayotgan vaqt yo‘l qo‘ygan kamchiliklari yuzasidan ogohlantirish berildi”, – deyiladi tuman hokimligi xabarida.
Ma’lumot uchun, Musa Anarboyev Baxmal tumaniga 2018-yil 3-apreldan buyon hokimlik qilib kelyapti. Shuningdek, u 2007–2009-yillar davomida Jizzax viloyati hokimi sifatida ham ishlagan.
Eslatib o‘tamiz, shu yilning yanvar oyida Farg‘onaning Cho‘ng‘arasiga tashrif buyurgan Shuhrat G‘aniyevni atlas ko‘ylakli qizaloq non bilan kutib olgandi. Hokim va safdoshlari qalin kiyimda, qizcha esa yupqa atlas ko‘ylakda turgani ijtimoiy tarmoqlarni junbishga keltirib, ko‘plab tanqidiy post va izohlar yozilgach hokimlik matbuot xizmati munosabat bildirib, qizcha atigi ikki daqiqa ochiq havoga chiqqanini yozgandi.
22-noyabr kuni esa ijtimoiy tarmoqlarda Andijon shahridagi 43-maktab o‘quvchilarining sovuqda ikki qator bo‘lib, yupun kiyimlarda bayroq ko‘tarib mahalliy amaldorlarni kutib olayotgani aks etgan surat tarqaldi. Bolalar 19-noyabr kuni “Yangi O‘zbekiston — yangicha dunyoqarash” shiori ostida O‘zbekistonda ko‘zga ko‘ringan ziyolilar, san’at, fan-madaniyat xodimlari hamda faol nuroniylardan iborat targ‘ibot guruhini kuzatgani olib chiqilgani ma’lum bo‘lgan.
Andijon viloyat xalq ta’limi boshqarmasi rasmiy munosabatida rasmdagi bolalar 2—3 daqiqa tashqarida qolishgani, so‘ng sinf xonalariga kirishgani aytilgan. Voqeadan so‘ng ushbu maktab direktori va uning o‘rinbosari ishdan olingan.
Izoh (0)