O‘zbekistonda daraxtlar va butalar qimmatbaho navlarini kesilishiga joriy qilingan moratoriy 2021-yil oxirigacha uzaytirilishi mumkin. “Gazeta.uz”ning ma’lum qilishicha, Ekologiya va atrof-muhitni muhofaza qilish davlat qo‘mitasi bu haqda Vazirlar Mahkamasiga tegishli taklif kiritgan.
Qo‘mita vakilining ta’kidlashicha, daraxt kesilishiga eng katta ta’sir qurilish obyektlarida uchramoqda. “Qurilish borki, hech bo‘lmaganda bitta daraxt kesilish holati uchraydi. Moratoriyni uzaytirish bilan birga, qurilish obyektlariga tavsiyalar va talablar qo‘yilishi rejalashtirilgan”, — dedi qo‘mita axborot xizmati rahbari Abdullayev Bunyod.
Prezidentning 2019-yil 30-oktabrdagi farmoni bilan davlat o‘rmon fondiga kirmaydigan daraxtlar va butalar qimmatbaho navlarining kesilishiga 2019-yil 1-noyabrdan 2020-yil 31-dekabrga qadar moratoriy joriy etilgan edi. Ushbu hujjat bilan moratoriy amal qilish davrida vakolatli davlat organlariga daraxt va butalar qimmatbaho navlari kesilishiga ruxsat berishi man etilgan.
Moratoriy amal qilish muddati tugamasdan daraxtlarni noqonuniy kesish bilan bog‘liq bir qancha holatlar qayd etilgan edi. May oyida Surxondaryoda fuqaro avtoservis qurish maqsadida 35 tup qarag‘ay daraxtini kesgani uchun 165,5 million so‘m miqdorida jarimaga tortilgan.
Iyulga kelib Davlat ekologiya qo‘mitasi Toshkent markazida ko‘p yillik chinorlar noqonuniy ravishda kallaklab tashlanganini tasdiqlagandi. Voqea joyiga poytaxt hokimi Jahongir Ortiqxo‘jayev ham tashrif buyurib, muammoni sud orqali hal etish lozimligi va kim nohaq bo‘lsa, o‘sha qonun oldida javob berishi kerakligini ta’kidlagan edi. Iyul oyida shu kabi holat Nurafshonda ham kuzatildi. Unda yo‘l chetidagi 37 tup daraxt, shundan 26 tup ko‘p yillik chinorlar kesib tashlangani va zarar 1,1 milliard so‘mni tashkil etgani aniqlangan.
Shu kunlarda “Turkiston” saroyi atrofidagi daraxtlarga belgi qo‘yilgani va ular kesilishi mumkinligi haqidagi xabarlar ijtimoiy tarmoqlarda keng muhokamalarga sabab bo‘lgan edi. Davlat ekologiya qo‘mitasi belgi qo‘yilgan daraxtlar imkon qadar kesilmasligini, o‘simlik zararkunandalari va tabiiy omillar ta’sirida zararlangani, turli kommunikatsiyalarga tahdid solayotgan daraxtlarga maxsus belgi qo‘yilganini ma’lum qilgan edi.
7-noyabr kuni ijtimoiy tarmoqlarda Chilonzor tumanidagi Gagarin ko‘chasida joylashgan daraxtlarning noqonuniy kesilish holati bo‘yicha joylashtirilgan post yuzasidan olib borilgan o‘rganish ishlarida bir dona chinor daraxti noqonuniy kesilgani aniqlangandi. O‘simlik dunyosiga keltirilgan zarar 42,9 million so‘mni tashkil etgan.
Izoh (0)