O‘zbekistonda 2021-yildan barcha iste’molchilar elektr energiyasi uchun to‘lovlarni oldindan amalga oshirishi mumkin

Energetika vazirligi elektr energiyasidan foydalanuvchi yuridik yoki jismoniy shaxslarning xizmat uchun to‘lovlarni oldindan to‘lashlariga oid Vazirlar Mahkamasining tegishli qarori loyihasini muhokamaga qo‘ydi.

Hujjat loyihasiga ko‘ra, 2021-yil 1-fevraldan barcha iste’molchilarga (jumladan, maishiy iste’molchilarga) yetkazib berilgan elektr energiyasi uchun to‘lovlar, mulkchilik shakli va idoraviy mansubligidan qat’i nazar, faqat oldindan to‘lov asosida amalga oshiriladi.

To‘lovni amalga oshirmagan iste’molchilarga nisbatan elektr tarmoqlaridan to‘liq uzish chorasi ko‘riladi.

Alohida xavfli hamda elektr energiyasining uzib qo‘yilishi texnogen va avariyali oqibatlarga olib kelishi mumkin bo‘lgan, uzluksiz texnologik jarayonga ega bo‘lgan sanoat korxonalarida qarzdorlik vujudga kelgan taqdirda haq to‘lanmaganligi uchun elektr energiyasi yetkazib berilishini cheklash belgilangan tartibda elektr ta’minotining avariya bronigacha, to‘liq uzib qo‘yish esa faqat sud qaroriga ko‘ra amalga oshirilishi mumkin.

Hududiy elektr tarmoqlari korxonasi hamda elektr energiyasi iste’molchisi tomonidan imzolangan texnologiya va avariya broni dalolatnomalari shartnomaning uzviy qismi hisoblanadi.

Eslatib o‘tamiz, amaldagi Vazirlar Mahkamasi qarorining mazkur bandiga ko‘ra, maishiy iste’molchilar har oyning 10-sanasiga qadar o‘tgan oyda iste’mol qilingan elektr energiyasi uchun to‘liq hisob-kitob qilishlari shartligi belgilab qo‘yilgan.

Avvalroq To‘raqo‘rg‘on IESda avariyaviy o‘chish yuz berishi oqibatida Namangan viloyatining aksar hududlari elektrsiz qolgani, Taxiatosh IES sovuq kunlarda qariyb bir yarim kun ishlamay qolgani, Farg‘ona viloyatida elektr energiyasi ta’minotida 28 soatgacha uzilishlar kuzatilayotgani, Surxondaryoda elektr ta’minotida uzilishlar yuz bergani, Kelesdagi tug‘ruqxona elektr ta’minotida uzilish kuzatilgani haqida xabar berilgan edi.

Energetika vazirligi O‘zbekistonda elektr energiyasi ta’minotidagi uzilishlarning asosiy sababi havoning sovib ketishi natijasida elektr energiyasi iste’molining keskin ortishi ekanligini ma’lum qilgan.