Kattaqo‘rg‘onda elektr energiyasi uzib qo‘yilishi oqibatida fermer xo‘jaliklariga yetkazilgan 1 mlrd 54 mln so‘mlik zarar undiriladi

Samarqand viloyatining Kattaqo‘rg‘on tumanida elektrsiz qolgan issiqxona bir kechada 35 ming dollar zarar ko‘rgani haqida xabar berilgan edi. Zarnews’ning ma’lum qilishicha, xabar o‘rganib chiqilganda mazkur holat haqiqatan ham ushbu tumanda sodir bo‘lgani aniqlandi.

Jumladan, “Kattaqo‘rg‘on Valijon parranda” MChJ raisi M.Ulug‘murodov 18-noyabrdan 19-noyabrga o‘tar kechasi tuman elektr tarmoqlari korxonasi tomonidan 6 soat mobaynida elektr energiyasi uzib qo‘yilishi oqibatida 1 gektar maydondagi issiqxonada ekilgan pomidor muzlab qolishi oqibatida 231 million so‘m zarar ko‘rganini bayon etib, Kattaqo‘rg‘on tuman prokuraturasiga murojaat qilgan.

Tumandagi “Murodulla bobo” fermer xo‘jaligi rahbari F.Nasrullayev esa issiqxonasidagi 1 gektar maydondagi pomidor va 1 gektar yerdagi bodring ko‘chatlari va hosilining muzlab qolishi oqibatida 823 million so‘m moddiy zarar ko‘rgan.

Fermer xo‘jaliklari va elektr tarmoqlari korxonalari o‘rtasida tuzilgan shartnomaga ko‘ra, ta’minotchi iste’molchiga elektr energiyasini yetarli miqdorda va uzluksiz yetkazib berishi lozim bo‘lgan.

Shartnoma shartlari buzilgani va majburiyat bajarilmagani sababli Kattaqo‘rg‘on tumani prokuraturasi 23-noyabr kuni mazkur holatlar yuzasidan “Samarqand hududiy elektr tarmoqlari” aksiyadorlik jamiyatidan fermer xo‘jaliklariga yetkazilgan 1 milliard 54 million so‘m moddiy zararni undirish yuzasidan Kattaqo‘rg‘on tumanlararo iqtisodiy sudiga da’vo arizasi kiritgan.

Qayd etilishicha, tadbirkorlar manfaatini himoya qilish va ularga yetkazilgan zarar undirilishi shaxsan viloyat prokurori nazoratiga olindi.

Avvalroq Energetika vazirligi issiqxonalar muqobil yoqilg‘i ta’minotiga ega bo‘lishi kerakligini ma’lum qilgani haqida xabar berilgan edi.

Eslatib o‘tamiz, respublika bo‘ylab elektr energiyasi ta’minoti bilan bog‘liq muammolar yuzaga kelgani sabab Tanzila Norboyeva gaz va elektr muammosi maxsus ko‘rib chiqilishi, yalpi majlisda ko‘tarilishi, Prezidentga axborot berilishini aytdi. Energetika vazirligi O‘zbekistonda elektr energiyasi ta’minotidagi uzilishlarning asosiy sababi havoning sovib ketishi natijasida elektr energiyasi iste’molining keskin ortishi ekanligini ma’lum qildi.