Ўзбекистонда 2021 йил давомида табиий газ ва электр энергияси истеъмоли учун тарифлар оширилмаслиги белгиланмоқда. Бу ҳақда Олий Мажлис Қонунчилик палатаси депутати Расул Кушербаев маълум қилди.
Унинг айтишича, мазкур норма 2021 йил учун мўлжалланган Давлат бюджети лойиҳасида қайд этилган.
24 ноябрь куни Қонунчилик палатасининг ялпи мажлисида иштирок этган бош вазир Абдулла Арипов ҳам буни тасдиқлаб, бу аҳоли учун енгиллик яратиш ва қўллаб-қувватлаш йўлида қилинаётганлигини билдириб ўтган.
«Умид қиламизки, бу сифатга таъсир қилмайди», — дейди депутат.
Мавзуга доир: Ўзбекистонда 2021 йилдан барча истеъмолчилар электр энергияси учун тўловларни олдиндан амалга ошириши мумкин
Давлат раҳбари 26 октябрь куни электр энергетикаси корхоналарини трансформация қилиш бўйича устувор вазифалар муҳокамаси юзасидан ўтказган йиғилишда 4 та давлат электр энергетикаси корхонасининг молиявий модели ва бизнес режаларини ишлаб чиқиш бўйича топшириқ берганди.
Қайд этиш жоиз, сўнгги бир ҳафтада Ўзбекистонда ҳаво ҳароратининг кескин совиши ортидан электр ва газ таъминотида жиддий муаммолар юзага келмоқда. Хусусан, Тўрақўрғон, Тахиатош ва Таллимаржон иссиқлик энергия станцияларида кетма-кет авариялар юз бергани маълум бўлди. Фарғона вилоятида электр энергияси таъминотида 28 соатгача узилишлар кузатилмоқда, хусусан, вилоятнинг Ўзбекистон туманида ўн минглаб аҳоли бир суткадан ортиқ электр таъминотисиз қолиб кетди. Каттақўрғонда электрсиз қолган иссиқхона бир кечада 35 минг доллар зарар кўрди, қашқадарёлик тадбиркор уч кун электрсиз қолгани сабаб олти мингта товуғидан айрилди.
Изоҳ (0)