Oliy Majlisi Qonunchilik palatasining Mudofaa va xavfsizlik masalalari qo‘mitasi fuqarolardan yo‘l harakati xavfsizligi tizimini yanada takomillashtirish yuzasidan o‘z taklif va tavsiyalarini berishni so‘ramoqda. Taklif va mulohazalarni mudofaa@parliament.gov.uz elektron pochta manziliga jo‘natish zarur, deyiladi Parlamentning quyi palatasi axborot xizmatining xabarida.
Noyabr oyi davomida O‘zbekiston Respublikasi Ichki ishlar vazirligi rahbariyatining “2018—2022-yillarda O‘zbekiston Respublikasida Yo‘l harakati xavfsizligini ta’minlash konsepsiyasi” doirasida amalga oshirilgan ishlar to‘g‘risidagi axboroti qo‘mitaning kengaytirilgan yig‘ilishida muhokama qilinadi.
Yig‘ilishda yo‘llarda yo‘l-transport hodisalarining sodir etilishi, tirbandlikning hosil bo‘lishiga imkon beruvchi sabab va shart-sharoitlarni bartaraf etish, yo‘l harakati qoidalarini buzilishi profilaktikasi tizimini takomillashtirish, yo‘llarni saqlash va ularni yo‘l belgilari, axborot ko‘rsatkichlari va boshqa texnik vositalari bilan jihozlash bo‘yicha o‘rnatilgan talablarga rioya etilishini ta’minlash, yoshlarda yo‘l harakati qoidalari bilan bog‘liq bilimlarini oshirish, ularda xavfsiz va qonunga itoat qilish xulq-atvori ko‘nikmalarini shakllantirish, fuqarolarga davlat xizmatlarini ko‘rsatishning soddalashtirilgan tartib-taomillarini nazarda tutuvchi zamonaviy axborot-kommunikatsiya texnologiyalarini keng qo‘llash, ichki ishlar organlari yo‘l harakati xavfsizligi bo‘linmalarining xodimlari xizmat vazifalarini lozim darajada bajarishi ustidan nazoratni kuchaytirish, ular orasida korrupsiya va vakolatni suiiste’mol qilish holatlarini oldini olish va boshqa masalalar yechimi yuzasidan amalga oshirilgan chora-tadbirlar samaradorligi va natijadorligi ko‘rib chiqiladi.
Qo‘mitaning kengaytirilgan yig‘ilishi yakuni bo‘yicha yo‘l-harakati xavfsizligi tizimini yanada takomillashtirish yuzasidan normativ-huquqiy hujjatlar loyihalarini ishlab chiqish rejalashtirilmoqda.
Avval O‘zbekistonda YTH kelib chiqishiga sabab bo‘layotgan avtomobil yo‘llarini ta’mirlamaslik oqibatida qancha fuqaro vafot etgani ma’lum qilingan, shuningdek, O‘zbekistonda o‘tgan to‘qqiz oy ichida sodir bo‘lgan YTHlar oqibatida qariyb 1300 kishi halok bo‘lgani haqida xabar berilgandi.
Izoh (0)