Олий Мажлиси Қонунчилик палатасининг Мудофаа ва хавфсизлик масалалари қўмитаси фуқаролардан йўл ҳаракати хавфсизлиги тизимини янада такомиллаштириш юзасидан ўз таклиф ва тавсияларини беришни сўрамоқда. Таклиф ва мулоҳазаларни mudofaa@parliament.gov.uz электрон почта манзилига жўнатиш зарур, дейилади Парламентнинг қуйи палатаси ахборот хизматининг хабарида.
Ноябрь ойи давомида Ўзбекистон Республикаси Ички ишлар вазирлиги раҳбариятининг «2018—2022 йилларда Ўзбекистон Республикасида Йўл ҳаракати хавфсизлигини таъминлаш концепцияси» доирасида амалга оширилган ишлар тўғрисидаги ахбороти қўмитанинг кенгайтирилган йиғилишида муҳокама қилинади.
Йиғилишда йўлларда йўл-транспорт ҳодисаларининг содир этилиши, тирбандликнинг ҳосил бўлишига имкон берувчи сабаб ва шарт-шароитларни бартараф этиш, йўл ҳаракати қоидаларини бузилиши профилактикаси тизимини такомиллаштириш, йўлларни сақлаш ва уларни йўл белгилари, ахборот кўрсаткичлари ва бошқа техник воситалари билан жиҳозлаш бўйича ўрнатилган талабларга риоя этилишини таъминлаш, ёшларда йўл ҳаракати қоидалари билан боғлиқ билимларини ошириш, уларда хавфсиз ва қонунга итоат қилиш хулқ-атвори кўникмаларини шакллантириш, фуқароларга давлат хизматларини кўрсатишнинг соддалаштирилган тартиб-таомилларини назарда тутувчи замонавий ахборот-коммуникация технологияларини кенг қўллаш, ички ишлар органлари йўл ҳаракати хавфсизлиги бўлинмаларининг ходимлари хизмат вазифаларини лозим даражада бажариши устидан назоратни кучайтириш, улар орасида коррупция ва ваколатни суиистеъмол қилиш ҳолатларини олдини олиш ва бошқа масалалар ечими юзасидан амалга оширилган чора-тадбирлар самарадорлиги ва натижадорлиги кўриб чиқилади.
Қўмитанинг кенгайтирилган йиғилиши якуни бўйича йўл-ҳаракати хавфсизлиги тизимини янада такомиллаштириш юзасидан норматив-ҳуқуқий ҳужжатлар лойиҳаларини ишлаб чиқиш режалаштирилмоқда.
Аввал Ўзбекистонда ЙТҲ келиб чиқишига сабаб бўлаётган автомобиль йўлларини таъмирламаслик оқибатида қанча фуқаро вафот этгани маълум қилинган, шунингдек, Ўзбекистонда ўтган тўққиз ой ичида содир бўлган ЙТҲлар оқибатида қарийб 1300 киши ҳалок бўлгани ҳақида хабар берилганди.
Изоҳ (0)