Yo‘l-transport hodisalarining kelib chiqishiga sabab bo‘layotgan avtomobil yo‘llarini ta’mirlamaslik oqibatida salkam 2 yil ichida 191 nafar fuqaro halok bo‘lgan. Buni Oliy Majlis Senatining sakkizinchi yalpi majlisida senator Qutbiddin Burhonov yo‘l harakati xavfsizligini ta’minlash va sohaga oid qonun hujjatlarining ijro etilishi yuzasidan Vazirlar Mahkamasiga yuborilgan parlament so‘rovida qoldirilgan kamchiliklar qatorida sanab o‘tdi.
Mavzuga doir: O‘zbekistonda o‘tgan to‘qqiz oy ichida sodir bo‘lgan YTHlar oqibatida qariyb 1300 kishi halok bo‘ldi
Jumladan, mutaxassislar tomonidan YTHlarning kelib chiqishiga sabab bo‘layotgan avtomobil yo‘llarini zarur darajada ta’mirlashga e’tibor qaratilmagani oqibatida 2019-yilda va 2020-yilning 8 oyi davomida 532 ta yo‘l-transport hodisasi sodir etilib, ularda 511 nafar fuqaro jarohatlangan va 191 nafar fuqaro halok bo‘lgani aytib o‘tildi. Shuningdek, Davlat yo‘l harakati xavfsizligi xodimlari tomonidan harakat xavfsizligini ta’minlash, yo‘l-transport hodisalarining oldini olish, harakat ishtirokchilariga qulayliklar yaratish yuzasidan mahalliy hokimliklar hamda tegishli tashkilot va idoralarga 2017-2020-yillar davomida jami 6 709 ta taqdimnoma kiritilgan bo‘lsa-da, ularning 3 173 tasi yoki 45 foizi belgilangan muddatlarda ko‘rib chiqilmagani ta’kidlandi.
Bu kabi kamchiliklar Davlat yo‘l harakati xavfsizligi xodimlari tomonidan kiritilayotgan taqdimnomalar ijrosini ta’minlamagan mutasaddilarga nisbatan ta’sirchan choralar ko‘rishni taqozo etayotgani bildirildi.
Avtomobil yo‘llar qo‘mitasi raisining birinchi o‘rinbosari Shuhrat Nazarov senatorlarning axborotiga javob berar ekan, taqdimnomalarning 45 foizi bajarilmaganligi bevosita byudjetga bog‘liqligi, taqdimnomalardagi choralar birinchi navbatda harakat xavfsizligi va o‘lim bilan bog‘liq yo‘l hududlariga yo‘naltirilgani, keyingi yillarda Moliya vazirligi bilan birga xalqaro moliya tashkilotlari ko‘magida bu bo‘yicha ishlarni yakunlanishini ta’kidladi.
Eslatib o‘tamiz, avgust o‘rtalarida ichki ishlar vaziri Po‘lat Bobojonov O‘zbekistonda 2020-yilning o‘tgan yetti oyi davomida sodir etilgan jinoyatlarning har uchtadan bittasi firibgarlik, o‘g‘irlik va yo‘l-transport hodisasi hisobiga to‘g‘ri kelayotgani to‘g‘risida ma’lum qilgandi.
