O‘zbekiston Hisob palatasi budjet tashkilotlari xodimlarining moddiy rag‘batlantirish to‘lovlari qisqartirilishiga qarshi chiqdi

O‘zbekiston Hisob palatasining “2021-yil uchun O‘zbekiston Respublikasi Davlat budjeti to‘g‘risida”gi qonuni loyihasi va 2021-yil uchun Budjetnoma bo‘yicha xulosasi e’lon qilindi.

Xulosada aytilishicha Moliya vazirligi kiritgan loyihada O‘zbekiston Respublikasining 2021–2023-yillarga mo‘ljallangan fiskal strategiyasining ish haqi va boshqa to‘lovlar bo‘yicha budjet siyosatida:

• ta’lim muassasalaridan tashqari budjet tashkilotlarida moddiy rag‘batlantirish jamg‘armasidan to‘lovlarni 5 foizga;
• ta’lim muassasalarida ishlovchi xodimlarga direktor jamg‘armasidan to‘lanuvchi to‘lovlarni 4 foizga qisqartirish taklif qilingan.

Hisob palatasi, davlat hokimiyati va boshqaruvi organlarining shtat birliklarini 10 foizga qisqartirish natijasida maqbullashtiriladigan 550 milliard so‘m va davlat maqsadli jamg‘armalariga ehtiyojga nisbatan ortiqcha berilayotgan 1,3 trillion so‘m budjet transfertlarini budjet tashkilotlari xodimlarini moddiy rag‘batlantirish jamg‘armasiga yo‘naltirishni maqsadga muvofiq deb topgan.

Avvalroq 2021-yilgi O‘zbekiston davlat budjeti defitsit bilan qabul qilinishi kutilayotgani xabar qilingandi.