O‘zbekistondagi elektron kundalik platformasi uchun ajratilgan sinov muddati tugagani munosabati bilan platformaning boshqa funksiyalaridan foydalanish uchun endilikda obuna bo‘lish lozim bo‘ladi. Bu haqda Xalq ta’limi vazirligi xabar berdi.
O‘zbekistonda 2020-yilning avgust oyida yangi 2020/2021-o‘quv yilidan boshlab 1200 ta maktabda qog‘oz kundaliklar va jurnallar bekor qilinishi ma’lum bo‘lgandi.
Elektron kundalik platformasiga yillik obuna narxi qog‘oz kundalikning o‘rtacha narxiga teng — 9200 so‘m. Uch va undan ortiq farzandi bor oilalar uchun 10 foizlik chegirma mavjud.
Ushbu pul to‘langach, ota-ona va o‘quvchining istagan boshqa yaqin qarindoshlari bir kalendar yil davomida bolaning maktab hayotini kuzatish imkoniga ega bo‘ladi.
Elektron to‘lovning ikki yo‘li mavjud — plastik karta hamda Click to‘lov tizimi orqali. Elektron kundalik uchun to‘lovni amalga oshirish yo‘riqnomasi bilan bu yerda tanishish mumkin.
Kundalik obunasi uchun to‘lovni 30-noyabrdan e’tiboran amalga oshirish mumkin. 23-noyabrdan sinov muddatining oxirgi 7 kuni boshlanadi.
Vazirlik matbuot xizmatining ma’lum qilishicha, bugungi kunga qadar 1557 ta maktab elektron kundalik tizimida ro‘yxatdan o‘tgan, shundan 1482 maktab qog‘oz jurnal va kundalikdan butunlay voz kechgan. 2020-yil 1-noyabr holatiga ko‘ra, O‘zbekistondagi 10 008 ta umumiy o‘rta ta’lim muassasalarida 6 236 751 nafar o‘quvchi ta’lim olmoqda.
Izoh (0)