Namangan viloyatida 80 yoshga to‘lgan fuqaro va uning 77 yoshli turmush o‘rtog‘i rasmiy ravishda nikohdan o‘tkazildi, deya xabar berdi viloyat DXM matbuot xizmatiga tayanib “Xabar.uz”.
Ma’lum qilinishicha, 1940-yil Namangan shahrida tug‘ilgan Mahmudjon Mirzaboyev 1943-yilda tug‘ilgan Rayhona Usmonova bilan shar’iy nikohdan o‘tib yashab kelayotgan bo‘lgan. Lekin shu vaqtga qadar ular qonuniy nikohdan o‘tmagan.
Oradan 55 yil vaqt o‘tib, Namangan shahar 2-sonli FHDYoda ularning nikohlari rasmiylashtirildi.
“To‘yimizga ko‘p vaqt bo‘lgan bo‘lsa-da, guvohnoma olish uchun vaqt ajratmaganimizni qarang. Hozir nevara, chevaralik bo‘lganimizda birinchi marta nikohni qayd etganimiz 80 yoshli yubiley to‘yimga ajoyib sovg‘a bo‘ldi”, – deydi Mahmudjon Mirzaboyev.Shuningdek, Namangan shahrida istiqomat qilayotgan 59 yoshlik Pak Gerontiy hamda 55 yoshni qarshilagan Dinara Abdurahmonovalarga ham nikohdan o‘tganlik to‘g‘risida guvohnoma berilgan. Ular ham 30 yildan ortiq nikoh guvohnomasiz yashab kelayotgan edi.
Avvalroq Andijonda uyda tug‘ilgani uchun o‘z vaqtida guvohnoma ololmagan to‘rt nafar bolaga tug‘ilganlik haqidagi guvohnoma berilgani, Zangiotada yashovchi 35 yoshli erkakka tug‘ilganlik to‘g‘risidagi guvohnoma berilgani hamda Toshkentda 25 yil hech qayerda qayd etilmagan yigitga fuqarolik pasporti berilgani haqida xabar berilgandi.
Izoh (0)