O‘zbekistonda 16-noyabr kuni koronavirus infeksiyasi oqibatida rasman biror kishi vafot etmadi. Bu haqda Sog‘liqni saqlash vazirligi ma’lum qildi.
Vazirlik matbuot xizmati tomonidan berilgan koronavirus bilan bog‘liq kunlik axborotga ko‘ra, 16-noyabr kuni O‘zbekistonda 201 holatda koronavirus aniqlangan (bu 23-iyundan beri (o‘shanda ham 201 holat aniqlangan) qayd etilgan eng past kasallanish ko‘rsatkichi; kasallanish ko‘rsatkichi 10-noyabrdan buyon muttasil pasayib kelmoqda).
Xuddi shu kuni 208 nafar bemor koronavirusdan sog‘ayib, uyiga kuzatilgan; ayni vaqtda kun davomida biror bemor koronavirus infeksiyasi asoratlari oqibatida vafot etmagan. Qayd etish joiz, O‘zbekistonda 3-iyuldan buyon (136 kundan beri) har kuni (uzluksiz) koronavirus infeksiyasi oqibatida kamida bir kishi vafot etayotgani SSV tomonidan e’lon qilinayotgandi.
Sog‘liqni saqlash vazirligi hisob-kitobiga ko‘ra, 16-noyabr holatiga ko‘ra O‘zbekistonda 598 kishi koronavirus infeksiyasi asoratlari oqibatida vafot etgan (lekin vazirlik ro‘yxatidagilarning kamida bir nafari O‘zbekistonda vafot etmagan), ayni vaqtda, “Daryo” nashri 22-sentabrga qadar yuritgan statistikaga ko‘ra, qurbonlar soni kamida 19 nafarga ko‘p (shu munosabat bilan qurbonlar soni 7-noyabr kuni 600 kishidan oshgan, deyish mumkin).
O‘zbekistonda koronavirusga chalinganlar soni 15-noyabr kuni rasman 70 ming kishidan oshdi. SSV ma’lumotlariga ko‘ra, 16-noyabr holatiga ko‘ra mamlakatda 70 444 ta kasallanish holati qayd etilgan (hozirgacha ularning 67 734 nafari (96 foizi) kasallikdan sog‘aygan). Biroq kasallanganlar soni aslida bundan kamida ikki-uch barobar ko‘p bo‘lishi mumkin. Buni, jumladan, SSV huzuridagi shtab a’zolari ham ta’kidlab, tan olgan.
Izoh (0)