Nyu-Yorkda 2012-yilda 67 nusxada ishlab chiqarilgan BMW M3 CRT modellaridan biri sotuvga qo‘yildi, deb xabar beradi CARakoom.
M3 CRT — bu cheklangan nusxada ishlab chiqarilgan to‘rt eshikli M3 GTS’ning kupe varianti hisoblanadi. Uning konstruksiyasida uglerod toladan keng foydalanilgan, shu sababli nomidan CRT (Carbon Racing Technology) o‘rin olgan. Ugleroddan bu kabi foydalanish BMW muhandislariga ortiqcha 70 kilogrammdan qutulish imkonini bergan.
Qolgan o‘zgarishlar qatoridan — unga ancha samarali tormozlar, buyurtma asosida yaratilgan 245/35 va 265/35 shinalar “kiygizilgan” 19 dyuymli g‘ildiraklar o‘rnatilgan.
M3 CRT 444 ot kuchini taqdim etishga qodir 4,4 litrli modernizatsiyaga uchragan V8 atmosfera dvigateli jihozlangan. U modelning soatiga 100 kilometr tezlikka 4,4 soniyada erishishini ta’minlaydi, maksimal tezligi — 290 km/soat.
Sotuvga qo‘yilgan nusxa Frozen Polar Silver, interyeri esa Melbourne Red rangida bo‘lib, o‘rindig‘i va rul chambaragi alkandara bilan qoplangan.
Mashina avvaliga 2012-yili BMW’ning Italiyadagi dilerlik markaziga sotilgan, biroq u yerda ro‘yxatdan o‘tkazilmagan. Avtomobilning birinchi egasi uni 2016-yilda sotib olgan va u AQShga eksport qilingan. Ayni vaqtga qadar u 804 ming kilometr yo‘l bosgan.
Izoh (0)