Davlat xavfsizlik xizmati O‘zbekistonga Rossiya, Tojikiston va Afg‘onistondan olib kelingan qariyb 80 kilogramm giyohvandlik vositalari noqonuniy aylanmasiga chek qo‘yilganini ma’lum qildi.
Davlat xavfsizlik xizmatining Chegara qo‘shinlari va Surxondaryo viloyati bo‘yicha boshqarmasi hamda viloyat ichki ishlar boshqarmasi xodimlari hamkorligida Uzun tumanida o‘tkazilgan tezkor tadbirda, 2005 va 2006-yillarda tug‘ilgan ikki nafar mahalliy fuqaro 20 kilo 374 gramm opiy va 41 kg 668 gramm gashish giyohvandlik vositalarini Tojikistondan kontrabanda yo‘li bilan olib kelgan vaqtida ushlangan.
Shundan so‘ng tezkor tadbir davom ettirilib, ularning jinoiy sherigi bo‘lgan, Uzun tumanida yashovchi, 2004-yilda tug‘ilgan shaxs hamda giyohvandlik vositasi byurtmachisi hisoblangan, Denov tumanida istiqomat qiluvchi, 2000-yilda tug‘ilgan fuqaro ham protsessual tartibda ushlangan.
Chegara qo‘shinlari harbiy xizmatchilari va DXX Toshkent viloyati bo‘yicha boshqarmasi hamda viloyat bojxona boshqarmasi xodimlari hamkorligida o‘tkazilgan tezkor tadbirda esa, Qozog‘istondan xalqaro o‘tkazish punkti orqali mamlakatga kirib kelgan Farg‘ona viloyatining Toshloq tumanida yashovchi, 1991-yilda tug‘ilgan shaxsga tegishli yuklar o‘rnatilgan tartibda tekshirilganda marmar quyma tosh ichiga yashirilgan 7 kilo 902 gramm “Mefedron” sintetik giyohvandlik vositasi borligi ma’lum bo‘lgan.
Tergovga qadar tekshiruv davomida, narkokuryer moddiy manfaatdorlik evaziga ushbu giyohvandlik vositasini Rossiyaning Moskva shahrida noma’lum shaxs tomonidan Telegram bot orqali ko‘rsatilgan manzildan olib, O‘zbekistondagi buyurtmachiga yetkazib berishi kerakligi aniqlangan. So‘ngra tezkor tadbir davom ettirilib, Bekobod tumanida istiqomat qiluvchi, 1985-yilda tug‘ilgan fuqaro O‘rta Chirchiq tumanida giyohvandlik vositasini qabul qilib olgan vaqtida ushlangan.
Davlat xafsizlik xizmatining Farg‘ona va Surxondaryo viloyatlari bo‘yicha boshqarmalari xodimlari tomonidan amalga oshirilgan tezkor-qidiruv tadbirlari natijasida afg‘onistonlik narkosavdogarlardan giyohvandlik vositalarini olib, Farg‘ona viloyatida sotish bilan shug‘ullangan shaxslar faoliyatiga chek qo‘yildi.
Xususan, Qo‘qon shahrida yashovchi, 1964-yilda tug‘ilgan ayol va uning 1993-yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan o‘g‘li qo‘lga olinib, ulardan Afg‘onistondan kontrabanda yo‘li bilan keltirilgan 5 kilo 878 gramm opiy va 3 kilo 922 gramm gashish moddalari ashyoviy dalil sifatida olingan.
O‘tkazilgan tezkor tadbirlar davomida xorijdan olib kelingan jami 79 kilo 744 gramm giyohvandlik vositalarining noqonuniy aylanmasiga chek qo‘yilgan.
Hozirda mazkur shaxslarning barchasiga nisbatan Jinoyat kodeksining 246 (kontrabanda) va 273-moddalari (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishlari qo‘zg‘atilib, qamoq ehtiyot chorasi qo‘llanildi. Tergov harakatlari olib borilmoqda.
Izoh (0)