Noma’lum milliarder Atlantika okeanidagi “Titanik” kemasi cho‘kkan joyga tushish uchun 10 million dollar to‘lamoqchi. U 2023-yilda “Titan” batiskafi bilan sodir bo‘lgan fojiadan keyin buni amalga oshiradigan birinchi odam bo‘ladi. Bu haqda New York Post xabar berdi.
Ekspeditsiya tafsilotlari sir saqlanmoqda, biroq tadqiqotchilar buni o‘zaro muhokama qilmoqda. Manbaga ko‘ra, safar bir necha haftadan keyin bo‘lib o‘tadi. “Siz uning ismini, albatta, bilasiz”, deydi suhbatdosh.
2023-yil 18-iyunda “Titanik” kemasi qoldiqlariga tushmoqchi bo‘lgan “Titan” batiskafi bedarak yo‘qolgandi. Qurilma suvga tushgandan ikki soat o‘tmay aloqa uzilib qolgan. To‘rt kundan so‘ng qutqaruvchilar uning bo‘laklarini topgan: batiskaf ichkariga yo‘naltirilgan portlash oqibatida butunlay vayron bo‘lgan. Uning qismlari va ekipaj a’zolariga tegishli deb taxmin qilingan qoldiqlar keyinchalik yuzaga chiqarildi.
Batiskaf OceanGate Expeditions kompaniyasiga tegishli bo‘lib, unda besh kishi bo‘lgandi: kompaniya asoschisi Stokton Rash, fransiyalik chuqur suvosti tadqiqotlari faxriysi Pol-Anri Narjeole, britaniyalik milliarder va kosmik sayyoh Hamish Harding, shuningdek, pokistonlik tadbirkor Shahzod Dovud va uning o‘g‘li Sulaymon.
2024-yil sentyabr oyida AQSHda halokat bo‘yicha sud muhokamalari o‘tkazilgan. Tergovning dastlabki kunlaridayoq Shimoliy Atlantikadagi fojia haqida kutilmagan tafsilotlar ma’lum bo‘lgan. Qirg‘oq qo‘riqlash xizmati ma’lumotlariga ko‘ra, 2021-yilda apparatda 70 ta, 2022-yilda esa yana 48 ta bartaraf etilishi kerak bo‘lgan nosozlik qayd etilgan.
OceanGate’ning sobiq texnik direktori Toni Nissenning aytishicha, Stokton Rash bilan ishlash juda qiyin bo‘lgan. Chunki u loyihani amalga oshirish muddatlarini tezlashtirgan, moliyalashtirishni qisqartirishga uringan, doimiy ravishda turli vazifalarga o‘zgartirishlar kiritib turgan.
Sud tinglovlarida, shuningdek, 2018-yilda batiskaf sinovlari vaqtida qurilmaga chaqmoq urib, uning korpusiga zarar yetkazgani, bu esa oradan bir necha yil o‘tib fojia kelib chiqishiga sabab bo‘lgani ta’kidlangan.
Izoh (0)