Meksikaning nisbatan osoyishta hisoblangan Puebla va Tlakskala shtatlarini bog‘lovchi yo‘l yoqasidan 19-avgust kuni 6 nafar erkakning uzilgan boshi topildi. Bu haqda BBC xabar berdi.
Mahalliy huquq-tartibot organlariga ko‘ra, ushbu shtatlar avval kartellarga oid jinoyatlar va zo‘ravonliklar bilan tanilmagan. Politsiya hozircha qotilliklar sababi yoki jinoyat ortida qanday jinoiy guruh turgani borasida izoh bermayapti. Biroq mahalliy OAVning xabar berishicha, hodisa joyida adyol qoldirib ketilgan bo‘lib, unda ogohlantiruvchi yozuv qayd etilgan. Mazkur xabarda raqib jinoiy guruhlarga tahdid yo‘llangan bo‘lib, u “La Barredora” (ya’ni “Supuruvchi”) nomidan imzolangan.
Prokuratura boshqarmasi topilgan boshlar erkaklarga tegishli ekanini tasdiqlagan va hodisa yuzasidan tergov boshlaganini ma’lum qilgan. Hududda narkotik savdosi bilan bir qatorda, yoqilg‘i kontrabandasiga — “huachicolea” nomi bilan mashhur noqonuniy faoliyatga ham duch kelinadi. Bu sohadagi noqonuniy daromadlar milliardlab dollarni tashkil qiladi. Meksika hukumati hozircha ushbu voqea yuzasidan rasmiy bayonot bermagan. Hodisa mamlakat prezidenti Klaudia Sheynbaum rahbarligidagi hukumatning fentanil savdosiga qarshi keskin kurash olib borayotgan paytiga to‘g‘ri kelmoqda.
Oldinroq, iyun oyida, Meksikaning Sinaloa shtatida 20 kishining jasadi topilgani, ulardan to‘rttasi boshsiz ekani xabar qilingandi. May oyida esa Guanajuato shtatida katolik bayramida yuz bergan otishma oqibatida 7 nafar yosh yigit halok bo‘lgan.
So‘nggi yillarda Meksikada kartellar o‘rtasidagi to‘qnashuvlar keskin kuchaygan. Hukumat 2006-yildan buyon harbiylarni jinoyatchilikka qarshi safarbar qilgan, ammo shu paytgacha yuz minglab odamlar halok bo‘lgan yoki bedarak yo‘qolgan.
Izoh (0)