Surxondaryo viloyati Uzun tumanida 2020-yil 11-noyabr kuni sodir etilgan yo‘l-transport hodisasi oqibatida to‘xtab turgan Nexia’dan tushgan 4 yoshli bola halok bo‘ldi. Bu haqda Surxondaryo viloyati IIB YHXB axborot xizmati xabar qilgan.
YHXBBning Telegram-kanalida e’lon qilingan videolavhada YTH tafsilotlari va avtohalokatga sabab bo‘lgan omillar tahlil qilingan.
Xabarga ko‘ra, Uzun tumani “Kichik joncheka” mahallasi hududidan o‘tgan R-4-101 avtomobil yo‘lida qarama-qarshi yo‘nalishida teskari tarzda o‘ziga qarab kelayotgan Nexia’ga chiroqlarini yoqib turgan boshqa bir Nexia’dan tushgan 4 yoshli bola YTH qurboniga aylangan. Nexia haydovchisining so‘zlariga ko‘ra, teskari turgan avtomobil chiroqlari ko‘zini qamashtirgan va to‘g‘ridan kelayotgan yuk mashinasidan olib qochib yo‘l chetiga chiqib o‘tib ketmoqchi bo‘lgan vaqtida bolakay va uning onasini urib yuborgan.
Halok bo‘lgan bolaning 12 yoshli akasi voqeaga bevosita guvoh bo‘lgan, uning aytishicha, haydovchi voqeadan keyin mashinasining davlat raqamlarini yechib olib, hodisa joyidan ketib qolgan.
To‘xtab turgan Nexia haydovchisining bergan ko‘rsatmalari bo‘yicha, kelayotgan Nexia haydovchisi tezlikni kamaytirmagan. Hodisa aybdori esa to‘xtab turgan mashinaning uzoqni yorituvchi chiroqlari yoqilganligi, to‘g‘ridan yuk mashinasi o‘z yo‘lida kelayotgani tufayli tezkor qaror qabul qilib o‘ng tomondan o‘tib ketishga uringanini bildirgan.
YTHdan keyin ikki haydovchi urishib ketgan va yo‘lda behush holda, ehtimol, o‘lib yotgan bolakayga parvo ham qilmagan.
Uzun tumani yo‘llardan foydalanish unitar korxonasi direktori Alijon Xudoyqulov avtomobil trassasining yoritish chiroqlariga ega emasligi, yo‘llarda yotiq chiziqlar o‘chib ketgani, aholi xonadonlarining yo‘llarga qum yoki g‘o‘zapoya to‘kib qo‘ygani yuzasidan izoh bera olmagan. Kamchiliklar 10 kun muddat ichida bartaraf qilinishini va’da qilgan.
“Kichik joncheka” mahallasi raisi Abduqodir Abdiyev xonadonlarning yo‘llarga qum, shag‘al yoki g‘o‘zapoya to‘kib qo‘ygani yuzasidan aholi orasida tushuntirish ishlari o‘tkazilishini bildirgan.
Shuningdek, videolavhada yo‘ldagi nosozliklarni bartaraf etilishiga mas’ul boshqa idoralar, jumladan, tuman Obodonlashtirish boshqarmasi, Elektr tarmoqlari korxonasining mas’ullari ham kamchiliklar bartaraf qilinishini ma’lum qilgan.
Tergovchi Sirojiddin Husanov hodisa yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi ochilganini qayd etgan.
Surxondaryoda odam o‘limiga sabab bo‘lgan YTHlar tez-tez sodir bo‘lib turadi, jumladan, 3-oktabrda Jarqo‘rg‘on tumani, “Oqtepa” mahallasi hududidan o‘tuvchi M-41 avtomobil yo‘lida Nexia avtobus bilan to‘qnashishi oqibatida 21 yoshli haydovchi va mashina ichidagi yo‘lovchi vafot etgan.
13-oktabrda Boysun tumanida Lacetti va Cobalt ishtirokida sodir bo‘lgan YTHda ikki kishi halok bo‘lgan. 2-noyabrda Sariosiyo tumanida Nexia yo‘ldan o‘tayotgan 9 yoshli bolani urib yuborgan, jabrlanuvchi shifoxonadan hayotdan ko‘z yumgan.
Izoh (0)