2020-yil 10-noyabr kuni Namangan viloyati Uychi tumanidan odam o‘lim bilan yakunlangan yo‘l transport hodisasi yuz berdi. Bu haqda YHXBB axborot xizmati xabar qilgan.
YHXBBning Telegram kanaliga yuklangan videolavhada aytilishicha, hodisa 10-noyabr kuni soat 19:40 larda Namangan–Uychi–Uchqo‘rg‘on 4R-116 yo‘lining 9-kilometrida BMW ayol piyodani urib yuborgan. Oqibatda jabrlanuvchi hodisa sodir bo‘lgan yerda vafot etgan.
Uychi tumani yo‘llardan foydalanish unitar korxonasi rahbarining so‘zlariga ko‘ra yo‘lda yotiq chiziqlar chizilishi, belgilar o‘rnatilgani, yoritish tizimi muammosi mablag‘ga bog‘liq masala ekani, yo‘lni joriy ta’mirlash ishlari olib borilgan.
Tuman obodonlashtirish boshqarmasi bosh muhandisi aholi yashaydigan punktlarni hech bo‘lmasa bir tomonlama yoritish masalasi ijobiy hal etilishi kerakligini qayd etgan. YTH sodir bo‘lgan yo‘lda ham yoritish chiroqlari o‘rnatilgani va qurilish tugamagani uchun hanuzgacha yoqilmaganini bildirgan. Tuman hokimligi bilan birgalikda besh kun ichida trassani yoritish ishlari amalga oshirilishini va’da qilgan.
Hodisa sodir bo‘lgan “Yorkata” MFY raisi ham voqeaga munosabat bildirib, mahallada aholi yashash xonadonlari zich joylashganligi, biroq aholining trotuarlardan foydalanish madaniyati yetarli darajada emasligini aytib o‘tgan. Ustunlardan birida tezlikni o‘lchovchi kamera o‘rnatilgani, ammo qurilma hozirgi kunda ishlamayotganini ta’kidlab, uni ishlatish choralarini ko‘rish lozimligini gapirgan. Piyodalar o‘tish yo‘lagini chizishni taklif etgan.
“10-noyabr kuni BMW’da Namangan–Uchqo‘rg‘on yo‘nalishida kelayotgan vaqtimda YTH sodir bo‘ldi. Afsusdaman, ushbu qilmishim uchun o‘zimni oqlay olmayman. Bu holat yaxshi emas. Har bir haydovchidan qoidalarga rioya qilgan holda yurishlarini so‘rayman”, — degan BMW haydovchisi.
Avvalroq Namanganda ikki yuk mashinasi ishtirokidagi YTH oqibatida yo‘lovchi vafot etgani, Andijonda Isuzu bilan to‘qnashgan Labo ikkita Nexia va Damas’ni urib yuborgani, Jizzaxda 2 ta Howo haydovchisi qarama-qarshi yo‘nalishda o‘zaro hazillashishi oqibatida mashinalar bir-biri bilan to‘qnashgani hamda Zarafshonda ichida yo‘lovchilar bo‘lgan ikkita avtobus ishtirokida avariya yuz bergani haqida xabarlar berilgan.
Izoh (0)