Shahrixonda Spark mast piyodani urib ketdi. Jabrlanuvchi shifoxonada vafot etgan

2020-yil 12-noyabr kuni Andijon viloyati Shahrixon tumanida Spark haydovchisi mast holda yo‘lda yotgan piyodani urib yuborib, yo‘l transport hodisasi sodir etgan. Bu haqda YHXBB xabar qilgan.

Xabarga ko‘ra 12-noyabr kuni soat 19:30 larda 4R-139 Shahrixon—Quva avtomobil yo‘lining 2-kilometrida YTH sodir bo‘lgan.

Andijon viloyati IIB YHXB boshlig‘i Saidolim Zingirovning aytishicha avtohalokatga Spark haydovchisining yomg‘ir ostida kelib boshqaruvni yo‘qotgani, piyodaning esa mast holda yo‘lda bemaqsad yotgani sabab bo‘lgan.

Shahrixon tumani hokimi Hikmatullo Dadaxonov YTH o‘zi rahbarligidagi sektor hududida sodir bo‘lgani tufayli voqea joyiga yetib kelgani va shifoxonaga ham borganini aytib o‘tgan.

Spark haydovchisi L.E. yo‘lda kelayotgan vaqtida ko‘chada piyodaning yotganini ko‘rgani, ammo rul chambaragini burishga ulgurmagani, oqibatda mast erkakni turtib yuborganini tan olgan. Shuningdek, voqea sodir bo‘lgan kuni yomg‘ir yoqqani tufayli ko‘rish qobiliyati pasaygani, yo‘ldagi ustunlardagi chiroqlar ham yoqilmaganini, hodisadan keyin jabrlanuvchini shifoxonaga olib borganini aytgan.

Videolavhada hodisa yuzasidan “Beshariq” MFY raisi Shavkat Ohunov, Shahrixon tumani yo‘llardan foydalanish unitar korxonasi rahbari Ravshan Husanov, Elektr tarmoqlari korxonasi bosh muhandisi Muzaffar Karimov ham fikr-mulohazalarini bildirib o‘tgan.