Yaxshi ot keyin chopadi. “Qarigan” chog‘ida porlagan taniqli futbolchilar

Odatda 25 yoshlarga kelib futbolchi faoliyatining eng yuqori cho‘qqisiga chiqadi, kimdir bu cho‘qqida uzoqroq qolsa, boshqasi bir-ikki mavsumda avvalgi darajasiga qaytadi. Ammo har sohada bo‘lgani kabi, futbolda ham istisnolar uchrab turadi. Quyida aynan shunday yosh shunchaki oddiy raqamlar ekanini isbotlay olgan va 30 yoshlar atrofida porlagan “qariya” yulduzlar haqida fikr yuritiladi.

Antonio di Natale

Italiya futbolining klassik “qariya”si Antonio di Natale  o‘zining yorqin faoliyatini 32 yoshida, bir mavsumda 29 ta gol bilan boshlagan.

Keyingi to‘rt mavsumda ham u 28, 29, 26 va 20 tadan gol urib, A Seriyaning ikki marotaba eng yaxshi to‘purariga aylangan. 2010-yilda u esa Italiyaning eng yaxshi futbolchisi deb topilgan.

Ajablanarlisi shundaki, 2009–2011-yillar oralig‘ida Yevropa kuchli beshlik ligalarida faqat Ronaldu va Messi italiyalikdan ko‘proq gol urgan. Di Natale 2016-yilda, o‘zi rejalashtirganidan ikki yil o‘tib, faoliyatini tugatadi.

Zlatan Ibragimovich

Zlatanning o‘zi tug‘ilganidan beri buyuk futbolchi bo‘lganini aytadi, biroq haqiqat shuki, shved gollarining katta qismini o‘ttiz yoshdan o‘tgach urgan.

Uning statistikasiga PSJdagi to‘rt mavsum juda katta ta’sir o‘tkazgan, Liga 1 haqida nima deyilishidan qat’i nazar, 35 yoshda 51 o‘yinda 50 ta gol urish – shunchaki dahshat. Bundan tashqari, u keyinchalik Angliyaga borib, bir mavsumda 28 ta gol urdi. Shundan so‘ng AQShni ham “zabt etish”ga ulgurdi. Hozirda esa Ibra 39 yoshida “Milan”ni o‘z ortidan ergashtira olmoqda.

Luka Toni

Bo‘yi 193 santimetr bo‘lgan, kuchli, iste’dodli va sovuqqon hujumchi har bir murabbiyning orzusi edi. Shunga qaramay, Luka 23 yoshigacha A Seriyada birorta ham o‘yin o‘tkazmagandi. Oradan to‘rt yil o‘tib, 2004-yilda u Italiya terma jamoasiga chaqiruv oldi.

Biroq haqiqiy “portlash” 28 yoshda “Fiorentina”ga va 30 yoshda “Bavariya”ga o‘tganidan keyin ro‘y berdi. U Myunxen klubida 46 o‘yin o‘tkazib, 39 ta gol urdi.

Toni 36 yoshida “Verona”da ikki mavsumda 44 ta gol urib, A Seriyaning eng keksa to‘purariga aylandi.

Markos Senna

Senna faoliyatini asl vatani Braziliyada boshlagan, ammo ko‘pchilik u haqida ilk marta 2002-yilda, “Vilyarreal”ga o‘tganidan keyin eshitgan. To‘g‘ri, Senna Ispaniyadagi dastlabki ikki mavsumda atigi 25 marta maydonga tushdi.

Faqat 2006-yilga kelibgina, Markos jamoasidagi asosiy tarkib bilan birga Ispaniya fuqaroligini ham qo‘lga kiritadi. U o‘shanda 29 yoshda edi. Vaqtida hatto uni “Manchester Yunayted” ham o‘z safiga qo‘shib olishga harakat qilgandi, ammo “xonakilashtirilgan” ispan yangi vatanini tark etishni istamadi. Shundan so‘ng u Yevro–2008 g‘olibiga aylandi va Ispaniyada yilning eng yaxshi o‘yinchisi deb topildi. Senna Ispaniyada yana besh yil o‘ynadi, karyerasini esa 2015-yilda, 38 yoshida “Nyu-York Kosmos” jamoasida yakunladi.

Jeymi Vardi

Vardi havaskor futboldan APL darajasiga ko‘tarilgan yagona futbolchi emas to‘g‘ri, biroq uning 2012-yilgacha “Flitvud Taun”da o‘ynab yurganiga hamon ishonish qiyin. O‘sha yili “Lester” Vardini 1 million funt evaziga sotib olgandi, bu esa havaskor uchun rekord miqdordagi summa edi. Hech kim o‘shanda uning bu darajagacha yetishini hatto taxmin ham qilmagan bo‘lsa kerak.

Keyingi mavsumda Vardi 16 ta gol uradi va “tulkilar” bilan APLga yo‘l oladi. Mamlakatning eng nufuzli turnirida esa Vardi 34 o‘yinda atigi 5 ta gol urdi. O‘yinchi APLga tortmayotgandek edi go‘yo.

Biroq 29 yoshda ingliz o‘zgacha bir bosqichga ko‘tarildi: Premyer Ligada 24 gol urdi va “Lester” bilan Angliya chempionatida g‘alaba qozondi. Shu tariqa u Angliya terma jamoasiga chaqirildi. Keyingi 5 mavsumda esa Vardi naq 85 ta marta o‘z nomini tabloga yozdirib qo‘ydi.

Marko Materatssi

Ha, bu o‘sha Zidanni kalla qo‘yishga majbur qilgan Materatssining xuddi o‘zi. U 28 yoshidagina terma jamoadagi debyutini o‘tkazadi, shu bilan birga o‘sha paytgacha uni klub darajasida juda kam odam tanir edi. U faoliyatining katta qismini Italiyaning quyi divizionlarida o‘tkazgan, shuningdek, Marko bir mavsum davomida Angliyaning “Everton” jamoasi sharafini ham himoya qilgan. 2001-yilda, debyut qilganida esa Marko “Peruja”ning yulduzi hisoblanardi.

O‘sha paytdan boshlab Materatssi top-darajadagi himoyachiga aylanib, beshta musobaqada bosh sovringa ega chiqqan: to‘rt martadan Italiya Kubogi va mamlakat Superkubogida, shuningdek, bir martadan Chempionlar Ligasi hamda klublar o‘rtasidagi Jahon chempionatida. Va, albatta, Jahon chempionligi.

Materatssi 2007-yilda, 33 yoshida Italiyaning eng yaxshi himoyachisi bo‘ldi. U 38 yoshiga qadar maydonda javlon urdi, biroq u uch yillik tanaffusdan so‘ng yana katta sportga qaytishga qaror qilib, Hindiston chempionatida yetti o‘yin o‘tkazdi.