Яхши от кейин чопади. «Қариган» чоғида порлаган таниқли футболчилар

Одатда 25 ёшларга келиб футболчи фаолиятининг энг юқори чўққисига чиқади, кимдир бу чўққида узоқроқ қолса, бошқаси бир-икки мавсумда аввалги даражасига қайтади. Аммо ҳар соҳада бўлгани каби, футболда ҳам истиснолар учраб туради. Қуйида айнан шундай ёш шунчаки оддий рақамлар эканини исботлай олган ва 30 ёшлар атрофида порлаган «қария» юлдузлар ҳақида фикр юритилади.

Антонио ди Натале

Италия футболининг классик «қария»си Антонио ди Натале  ўзининг ёрқин фаолиятини 32 ёшида, бир мавсумда 29 та гол билан бошлаган.

Кейинги тўрт мавсумда ҳам у 28, 29, 26 ва 20 тадан гол уриб, А Сериянинг икки маротаба энг яхши тўпурарига айланган. 2010 йилда у эса Италиянинг энг яхши футболчиси деб топилган.

Ажабланарлиси шундаки, 2009–2011 йиллар оралиғида Европа кучли бешлик лигаларида фақат Роналду ва Месси италияликдан кўпроқ гол урган. Ди Натале 2016 йилда, ўзи режалаштирганидан икки йил ўтиб, фаолиятини тугатади.

Златан Ибрагимович

Златаннинг ўзи туғилганидан бери буюк футболчи бўлганини айтади, бироқ ҳақиқат шуки, швед голларининг катта қисмини ўттиз ёшдан ўтгач урган.

Унинг статистикасига ПСЖдаги тўрт мавсум жуда катта таъсир ўтказган, Лига 1 ҳақида нима дейилишидан қатъи назар, 35 ёшда 51 ўйинда 50 та гол уриш – шунчаки даҳшат. Бундан ташқари, у кейинчалик Англияга бориб, бир мавсумда 28 та гол урди. Шундан сўнг АҚШни ҳам «забт этиш»га улгурди. Ҳозирда эса Ибра 39 ёшида «Милан»ни ўз ортидан эргаштира олмоқда.

Лука Тони

Бўйи 193 сантиметр бўлган, кучли, истеъдодли ва совуққон ҳужумчи ҳар бир мураббийнинг орзуси эди. Шунга қарамай, Лука 23 ёшигача А Серияда бирорта ҳам ўйин ўтказмаганди. Орадан тўрт йил ўтиб, 2004 йилда у Италия терма жамоасига чақирув олди.

Бироқ ҳақиқий «портлаш» 28 ёшда «Фиорентина»га ва 30 ёшда «Бавария»га ўтганидан кейин рўй берди. У Мюнхен клубида 46 ўйин ўтказиб, 39 та гол урди.

Тони 36 ёшида «Верона»да икки мавсумда 44 та гол уриб, А Сериянинг энг кекса тўпурарига айланди.

Маркос Сенна

Сенна фаолиятини асл ватани Бразилияда бошлаган, аммо кўпчилик у ҳақида илк марта 2002 йилда, «Вильярреал»га ўтганидан кейин эшитган. Тўғри, Сенна Испаниядаги дастлабки икки мавсумда атиги 25 марта майдонга тушди.

Фақат 2006 йилга келибгина, Маркос жамоасидаги асосий таркиб билан бирга Испания фуқаролигини ҳам қўлга киритади. У ўшанда 29 ёшда эди. Вақтида ҳатто уни «Манчестер Юнайтед» ҳам ўз сафига қўшиб олишга ҳаракат қилганди, аммо «хонакилаштирилган» испан янги ватанини тарк этишни истамади. Шундан сўнг у Евро–2008 ғолибига айланди ва Испанияда йилнинг энг яхши ўйинчиси деб топилди. Сенна Испанияда яна беш йил ўйнади, карьерасини эса 2015 йилда, 38 ёшида «Нью-Йорк Космос» жамоасида якунлади.

Жейми Варди

Варди ҳаваскор футболдан АПЛ даражасига кўтарилган ягона футболчи эмас тўғри, бироқ унинг 2012 йилгача «Флитвуд Таун»да ўйнаб юрганига ҳамон ишониш қийин. Ўша йили «Лестер» Вардини 1 миллион фунт эвазига сотиб олганди, бу эса ҳаваскор учун рекорд миқдордаги сумма эди. Ҳеч ким ўшанда унинг бу даражагача етишини ҳатто тахмин ҳам қилмаган бўлса керак.

Кейинги мавсумда Варди 16 та гол уради ва «тулкилар» билан АПЛга йўл олади. Мамлакатнинг энг нуфузли турнирида эса Варди 34 ўйинда атиги 5 та гол урди. Ўйинчи АПЛга тортмаётгандек эди гўё.

Бироқ 29 ёшда инглиз ўзгача бир босқичга кўтарилди: Премьер Лигада 24 гол урди ва «Лестер» билан Англия чемпионатида ғалаба қозонди. Шу тариқа у Англия терма жамоасига чақирилди. Кейинги 5 мавсумда эса Варди нақ 85 та марта ўз номини таблога ёздириб қўйди.

Марко Матерацци

Ҳа, бу ўша Зиданни калла қўйишга мажбур қилган Матераццининг худди ўзи. У 28 ёшидагина терма жамоадаги дебютини ўтказади, шу билан бирга ўша пайтгача уни клуб даражасида жуда кам одам танир эди. У фаолиятининг катта қисмини Италиянинг қуйи дивизионларида ўтказган, шунингдек, Марко бир мавсум давомида Англиянинг «Эвертон» жамоаси шарафини ҳам ҳимоя қилган. 2001 йилда, дебют қилганида эса Марко «Перужа»нинг юлдузи ҳисобланарди.

Ўша пайтдан бошлаб Матерацци топ-даражадаги ҳимоячига айланиб, бешта мусобақада бош совринга эга чиққан: тўрт мартадан Италия Кубоги ва мамлакат Суперкубогида, шунингдек, бир мартадан Чемпионлар Лигаси ҳамда клублар ўртасидаги Жаҳон чемпионатида. Ва, албатта, Жаҳон чемпионлиги.

Матерацци 2007 йилда, 33 ёшида Италиянинг энг яхши ҳимоячиси бўлди. У 38 ёшига қадар майдонда жавлон урди, бироқ у уч йиллик танаффусдан сўнг яна катта спортга қайтишга қарор қилиб, Ҳиндистон чемпионатида етти ўйин ўтказди.