9-noyabr, dushanba kuni ertalab Ispaniyaning “Sport.es” nashri shov-shuvli yangilikni e’lon qildi. Unda yozilishicha, “Yuventus” 2021-yilning yozida Krishtianu Ronalduni sotib yubormoqchi. Bunga sabab deya Turin klubi koronavirus pandemiyasi sharoitida xarajatlarni kamaytirishning turli variantlarini ko‘rib chiqayotgani aytilmoqda. Taxminlarga ko‘ra, klub Ronalduni sotish orqali uning transferi uchun sarflangan mablag‘ning ma’lum bir qismini qoplashga erishishni reja qilmoqda. Klubdagilar 35 yoshli futbolchi bilan shartnomani uzaytirish katta tavakkal deb hisoblaydi. Quyida Ronalduning atrofidagi vaziyat va uning qayerlarga yo‘l olishi mumkinligi haqida mulohaza yuritiladi.
Ronalduning o‘yinida pasayish kuzatildimi?
Bu borada (hozircha) Krishtianu bilan hammasi joyida: 2019/20-yilgi mavsumda u Italiya chempionatida (33 o‘yinda) 31 ta, mamlakat Kubogida 2 ta, Chempionlar Ligasida esa 4 ta gol urdi. Terma jamoada Ronaldu yildan yilga yaxshilanib bormoqda: 2019-yil samaradorlik bo‘yicha u uchun eng samarali yil hisoblanadi – 14 ta gol.
2020/2021-yilgi mavsumni ham Krish juda yaxshi boshladi: “Sampdoriya”ga qarshi birinchi tur o‘yinida urilgan gol va “Roma” bilan o‘yindagi dubl. Shundan so‘ng Krishtianu hozirgi zamon kishilarining eng katta dushmani – koronavirus infeksiyasini mag‘lub etib, bir oylik tanaffusdan keyin o‘yinga qaytdi va darhol dubl qayd etishga erishdi. Hozir hujumchining hisobida chempionatning 4 o‘yinida 6 ta gol bor.
Umuman olganda, Ronaldu “Yuventus”dagi faoliyati davomida 94 uchrashuvda 71 ta gol va 19 ta golli uzatmaga mualliflik qilgan. 35 yoshda bo‘lishiga qaramay, hujumchining statistikasi pasaymayapti, terma jamoadagisi esa faqat o‘smoqda.
Ronaldu faoliyatini qayerda davom ettirishi mumkin
PSJ
Oktabr oyidayoq Don Balon PSJning portugaliyalikni “Real”ga o‘tishi kutilayotgan Kilian Mbappega ideal o‘rinbosar sifatida ko‘rayotgani haqida xabar bergan edi. Fransuzlar buning uchun “keksa sinyora”ga 70 million yevro to‘lashga tayyor. Ronalduning o‘zi esa ushbu o‘tish orqali Yevropa milliy ligalarida “yengilroq” g‘alaba qozonish imkoniyatini ko‘rmoqda. Kim bilsin, balki parijliklar uchun Chempionlar Ligasini zabt etish uchun aynan Ronaldu yetishmayotgandir? PSJ bugungi kunda Yevropadagi yulduzlarning moliyaviy ehtiyojlarini qondirishga qodir kam sonli klublardan biri hisoblanadi. Shunday ekan, nega endi bu variant bo‘lmasligi kerak?
“Manchester Yunayted”
“Old Trafford”ga qaytish – ancha jarangdor yangramoqda. Biroq tan olish lozimki, “Manchester Yunayted” bilan Chempionlar Ligasida muvaffaqiyat qozonish ehtimoli ancha past, ammo bu ehtimoliy qaytishning amalga oshmasligiga aniq sabab bo‘la olmaydi. Hozirda ko‘pchilik Ronalduni aynan “qizil iblislar” bilan bog‘lamoqda.
O‘tgan mavsumda “qizil iblislar” ijobiy natija qayd etdi – APLda 3-o‘rin va Chempionlar Ligasi yo‘llanmasi. Biroq 2020/21-yilgi mavsumda klubda muammolar yetarlicha. Bunga jamoaning himoya chizig‘i yaqqol misol bo‘la oladi.
Shunga qaramay, hujumda Sulsher katta tanlovi imkoniyatiga ega. U yerda Rashford, Marsyal, Fernandesh va Grinvuddan tashqari, jamoaga yaqinda qo‘shilgan Kavani (yiliga 10 million yevro maosh bilan), Igalo, Mata, Lingard, Jeyms kabi hujumkor futbolchilar ham o‘z imkoniyatini kutib yotibdi. Ehtimol, “Yunayted” ushbu transferni amalga oshirar ham, ammo unga yana bir yuqori maoshli (bu pullarga yaxshi ikki nafar himoyachi sotib olish mumkin) hujumchining nima keragi bor...
MLS
Ronaldu MLS’ni yoqtirishi haqida bir necha bor gapirgan. “AQSh – ajoyib mamlakat. U yerda insonlar futbol o‘ynash uchun tegishli mentalitet va sharoitga ega. Ular futbol uchun qo‘llaridan kelgan barcha ishni qilmoqda va hali bundan ham ko‘proq narsani qilish mumkin. Agar men ushbu mamlakatda futbolni rivojlanishiga ko‘proq yordam bera olsam, buni qilishga tayyorman. Umid qilamanki, bir kun kelib MLS’da o‘ynashni boshlayman”, – degandi Ronaldu 2015-yilda.
Bir yil o‘tgach, Ronaldu yana Amerika mavzusi va unda o‘ynash istagi borligi mavzusiga to‘xtaldi: “MLS’da bo‘layotgan voqealar aqlga sig‘maydi. Balki kelajakda u yerda o‘ynash uchun yaxshi imkoniyatga ega bo‘larman. Hech qachon kelajakni oldindan ayta olmaysiz, ammo bu menda boshqacha bir hissiyot uyg‘otmoqda. Albatta, men ushbu variantni ko‘rib chiqyapman. Aytganimdek, u yerda futbol tobora yaxshilanib bormoqda, nega buni qilmasligim kerak? Menimcha, buni amalga oshirsa bo‘ladi.
Bilaman, ko‘plab futbolchilar MLS’ga o‘tmoqda. Liga yaxshilanmoqda. U o‘sib bormoqda, bu, albatta, yaxshi. Bu men va bir kun kelib, u yerga ko‘chib o‘tishni istaydigan yosh futbolchilar uchun yaxshi holat. U yerda futbol rivojlanib borayotgani ajoyib”.
2020-yilning yozida Ronalduning Portugaliya va “Manchester Yunayted”dagi sobiq jamoadoshi Nani hujumchining istagi haqida gapirar ekan, quyidagi so‘zlarni aytgandi: “Bir necha yil oldin Ronaldu menga faoliyatini Amerikada yakunlashi mumkinligini aytgandi. Bu 100 foiz emas, balki ehtimoliy holatdir. Unda bunday imkoniyat bor”.
Yana shuni qayd etish kerakki, Krishtianu MLS’dagi “Inter Mayami” klubi xo‘jayini Devid Bekhem bilan yaxshi munosabatlarga ega. Balki bu klub portugaliyalik hujumchining sharafli faoliyatidagi so‘nggi jamoa bo‘lar. Marketing va biznes nuqtayi nazaridan ushbu variant har ikkala sobiq “realchilar” uchun yutuq bo‘lib ko‘rinmoqda. Darvoqe, Madrid klubining amaldagi sardori Serxio Ramos ham agar “Real” bilan yangi shartnoma borasida kelisha olmasa, butsalarini aynan AQShda mixga ilish variantini ko‘rib chiqmoqda.
Nima bo‘lganda ham buyog‘iga nima bo‘lishini faqat va faqat vaqt ko‘rsatadi, bular esa shunchaki taxmin va mulohazalar edi.
- Krishtianu Ronalduning Portugaliya terma jamoasi safida JCh saralash bosqichlarida urgan barcha gollari (video)
- Krishtianu Ronalduning “Real” safidagi shedevr gollari (video)
- Krishtianu Ronalduning “Real” safida jarima zarbasidan urgan barcha gollar (video)
Mavzuga doir: Bugatti, Ferrari, Lamborghini va Rolls-Royce. Krishtianu Ronalduning garajiga sayohat (foto)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!