Bugatti, Ferrari, Lamborghini va Rolls-Royce. Krishtianu Ronalduning garajiga sayohat (foto)

Futbol olamida shunday shaxslar borki, ko‘pchilik muxlislarni ularning nafaqat maydondagi o‘yinlari, balki shaxsiy hayoti, soch turmagi va, albatta, qanday mashinalarda yurishi qiziqtiradi. Bu borada esa Portugaliya terma jamoasi va “Yuventus” yulduzi Krishtianu Ronaldu qolganlardan ancha ilgarilab ketgan. Bugungi kelib, Krishning garajida 20 ortiq mashinalar mavjud. Quyida e’tiboringizga Ronalduning eng qimmat “toychoq”lari haqida hikoya qilamiz.

McLaren Senna

McLaren Senna – Ronalduning eng qimmat sportkarlaridan bo‘lib, Krishtianu uni 2019-yilda xarid qilgan. Mashina narxi 850 ming yevroga baholangandi. Mazkur avtomobil 2018-yilda ishlab chiqarilgan bo‘lib, bu kabi mashinalarning soni dunyo bo‘ylab atigi 500 donani tashkil qiladi. Bundan tashqari, Senna McLaren tarixidagi eng kuchli model hisoblanadi: uning quvvati 800 ot kuchiga teng.

Bugatti Voiture Noire

Bugatti Voiture Noire – Ronalduning eng qimmat mashinalaridan biri aynan shunday nomlanadi. Mashina 1500 ming ot kuchiga ega bo‘lib, soatiga 420 kilometr tezlikda harakatlanishi mumkin. Ronaldu mazkur avtomobilni qo‘lga kiritish uchun naq 11 million yevrodan voz kechgan. Voiture Noire rasman 2021-yilda ishlab chiqariladi, ammo Krish allaqachon unga buyurtma berib bo‘lgan, shunday ekan u birinchilardan bo‘lib mazkur mashinani boshqarib ko‘radi.

Rolls-Royce Phantom

“Yuventus” yulduzi Turin ko‘chalarini oq rangli Rolls-Royce’da aylanishni xush ko‘radi. Ronaldu aynan Phantom Drophead Coupe seriyasidan keyin Rolls-Royce’ni yaxshi ko‘rib qolgan. Qayd etish o‘rinli Ronaldudan oldin Devid Bekhem ham mazkur brenddan foydalanardi. Ushbu mashina portugaliyalikka 410 ming yevroga tushgan.

Bugatti Chiron

Ushbu avtomobil Krishning garajidagi eng tezkor (soatiga 420 kilometr tezlikda harakatlana oladi), qimmat (2,8 million yevro) va sevimli mashinalaridan biri hisoblanadi. Portugaliyalik uning “kuzov” qismiga CR7 deb yozdirib olgan.

Bugatti Veyron

Ronalduning Nike reklamasida Bugatti bilan bellashganini ko‘pchilik yaxshi eslasa kerak. Suratga olish ishlaridan so‘ng esa Ronaldu 2,28 million yevro turadigan mashinani o‘zi bilan olib ketgan.

Ferrari 599 GTB Fiorano

2008-yilgi Chempionlar Ligasi finalidagi g‘alabadan keyin sotib olingan mashina Manchester aeroporti yaqinidagi tunnellarning birida pachoq qilib olinadi. Biroq Ronaldu bu mashinaga shunchalik mehr qo‘ygandiki, “Real”ga o‘tganidan keyin boshqa bir Fiorano sotib oladi. Ularning har biri uchun Krish 360 ming yevrodan to‘lagan.

Lamborghini Aventador LP 700-4

Oltinchi avlod superkari uchun Ronaldu, taxminan, 270 ming yevro sarflagandi. Va uni 27 yoshga to‘lgani munosabati o‘ziga sovg‘a qiladi.

Koenigsegg CCX 11

CCX 11 — Krishning eng tezkor sport avtomobillaridan biri bo‘lib, u 1018 ot kuchiga ega, tezligi esa 2,9 soniyada 100 km/soatgacha yetishi mumkin. Uning narxi 400 ming yevroni tashkil qiladi.

Maserati GranCabrio

2011-yilda Ronaldu Maserati reklamasida ishtirok etadi. Bir necha kundan so‘ng esa u aynan o‘sha mashinani 150 ming yevroga sotib oladi.

Aston Martin DB9

Aston Martin DB9 – Krishtianuning faoliyatidagi birinchi elita sport avtomobillaridan biri. Ronaldu buning uchun 135 ming yevro sarflagandi. Ya’ni “Manchester Yunayted”dagi bir haftalik maoshini.

Porsche 911 Turbo S

2016-yilning bahorida Krish brend tarixidagi eng kuchli Porsche uchun 250 ming yevro sarf qilgan. Mashina 580 ot kuchi, 3,8 litrli ikki silindrli dvigatel va uch soniyada 100 km/soatchaga tezlashish imkoniga ega.

Bugatti Centodieci

Ronaldu “Yuventus”ning A Seriya 2019/20-yilgi mavsumdagi g‘alabasi sharafiga 8 million yevroga Bugatti Centodieci sotib oldi, biroq u ushbu mashinani 2021-yilda qabul qilib oladi. Bugatti Centodieci cheklangan miqdorda ishlab chiqarilgan. Fransuz kompaniyasi ushbu mashinalarning atigi 10 tasini brendning 110-yilligiga bag‘ishlab ishlab chiqaradi. Avtomobilning maksimal tezligi soatiga 380 kilometrga teng. U 2,4 soniyada tezligini 100 km/soatgacha ko‘tarishi mumkin.

Bilol ERKIN tayyorladi