PSJ hujumchisi Neymar hali ham “Barselona”da qolib ketgan 43,6 million yevro pulini undirish niyatidan qaytmadi.
Avvalroq 28 yoshli futbolchi 2016-yilda “Barselona” bilan amaldagi shartnoma uzaytirgani uchun bonus tariqasida taqdim etilishi kerak bo‘lgan 43,6 million yevroni ololmagan va uni undirish uchun katalon klubini sudga bergandi. Shartnoma uzaytirilganidan bir yil o‘tib braziliyalik futbolchi PSJ safiga yo‘l olgan. Sud qaroriga ko‘ra, Neymarning so‘rovi rad etilgandi. Bundan tashqari futbolchiga “Barselona”ga 6,7 million yevro to‘lib berish majburiyati qo‘yilgandi.
Marca’ning xabar qilishicha, hujumchining advokatlari sud qarorini apellyatsiyaga bergan va yuqorida qayd etilgan miqdordagi pulni “Barselona”dan undirishni maqsad qilgan.
Neymar 2017-yilning yozida “Barselona”dan PSJ safiga yo‘l olgandi. Parijliklar futbolchining shartnomasida ko‘rsatilgan 222 million yevro miqdoridagi tovon pulini to‘lagan holda tarixdagi eng qimmat transferni amalga oshirgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)