O‘zbekiston Prezidenti Shavkat Mirziyoyev Shanxay Hamkorlik Tashkilotiga a’zo davlatlar rahbarlari kengashining videoanjuman shaklida o‘tgan majlisida nutq so‘zladi. Bu haqda Prezident matbuot xizmati xabar berdi.
O‘z nutqida O‘zbekiston Prezidenti xalqaro hamkorlikni mustahkamlash va koronavirus pandemiyasi sababli yuzaga kelgan pasayishdan keyin tashkilot mamlakatlarining iqtisodiyotini tiklashga qaratilgan bir qator tashabbuslarni ilgari surdi.
“Bizning asosiy maqsadimiz savdo va iqtisodiy aloqalarni, ishlab chiqarish kooperatsiyalarini jonlantirish. Aminmanki, ushbu maqsadga erishishning eng samarali usuli inqirozga qarshi dasturlarni birga amalga oshirish, o‘zaro savdo-sotiqdagi to‘siqlarni yo‘q qilish va bojxona talablarini soddalashtirishdir”, — dedi Shavkat Mirziyoyev.
O‘zbekiston Prezidentining qayd etishicha, pandemiya sharoitida tashkilot doirasidagi aloqalar savdo-iqtisodiy hamkorlik dasturini amalga oshirish bo‘yicha ShHTning asosiy rejasi bo‘lishi kerak.
“Oziq-ovqat xavfsizligi sohasidagi hamkorlik dasturini amalga oshirish bo‘yicha aniq chora-tadbirlarni ishlab chiqish muhim hayotiy ahamiyatga ega”, — dedi O‘zbekiston Prezidenti.
“Bugungi sharoitda birgalikdagi sa’y-harakatlarni aholining ehtiyojmand qatlamlarini qo‘llab-quvvatlash va kambag‘allikni qisqartirishga yo‘naltirish muhimdir. Bu boradagi hamkorligimizni muvofiqlashtirish maqsadida kambag‘allikka qarshi kurashish uchun mas’ul vazirlik va idoralar rahbarlarining yig‘ilishlarini o‘tkazish mexanizmini yaratish zarur, deb hisoblayman.
ShHTga a’zo davlatlarning mazkur yo‘nalishdagi hamkorligi dasturini ishlab chiqish, shuningdek, uni amalga oshirish bo‘yicha kelishilgan choralarni ishlab chiqish uchun O‘zbekistonda xalqaro forum o‘tkazishni taklif etaman”, — deya o‘z taklifini bildirdi davlat rahbari.
O‘zbekiston Prezidenti koronavirus pandemiyasi raqamlashtirish jarayonini tezlashtirganini ta’kidladi. “Axborot texnologiyalari iqtisodiy o‘sishning drayveri bo‘ladi”, — deya qo‘shimcha qildi davlat rahbari.
Shuningdek, Shavkat Mirziyoyev mazkur sammitda raqamli iqtisodiyot sohasidagi hamkorlikka doir bayonot o‘z vaqtida qabul qilinayotganini ma’lum qildi.
“O‘zaro kelishilgan o‘quv dasturlari asosida aholini o‘qitish, soha mutaxassislarini tayyorlashga qaratilgan ShHTning raqamli savodxonlikni rivojlantirish dasturini ishlab chiqishni taklif etaman”, — dedi Shavkat Mirziyoyev.
O‘zbekiston Prezidenti bugun insoniyat ilgari ma’lum bo‘lmagan infeksiyalar bilan duch kelayotganini va ularga qarshi kurashish kundalik turmushimizning bir qismiga aylanayotganini ta’kidladi.
“Shu munosabat bilan bugungi sammitda Epidemiya tahdidlariga qarshi kurash bo‘yicha qo‘shma chora-tadbirlarning kompleks rejasi qabul qilinishini olqishlaymiz. Uning amalga oshirilishini ta’minlash, xavfli yuqumli kasalliklarning tarqalishi to‘g‘risidagi axborot bilan samarali almashinuvni yo‘lga qo‘yish muhimdir”, — dedi davlat rahbari.
“Mamlakatlarimizning sohaga ixtisoslashgan shifoxonalari o‘rtasida natijador hamkorlikni yo‘lga qo‘yish maqsadida Epidemiyaga olib keluvchi kasalliklarga qarshi kurash bo‘yicha tibbiyot muassasalari tarmog‘ini yaratishni taklif etamiz”, — deya taklif bildirdi Shavkat Mirziyoyev.
Prezidentning qayd etishicha, ushbu tarmoq doirasida yuqumli kasalliklarni diagnostika, profilaktika qilish va davolash bo‘yicha tajriba almashish, vrachlar qo‘shma guruhlari faoliyatini tashkil etish va ularni tayyorlashga qaratilgan o‘zaro manfaatli loyihalarni amalga oshirish mumkin.
Shavkat Mirziyoyev Rossiya va Xitoyga koronavirus infeksiyasiga qarshi kurashda ko‘rsatilgan katta yordam va ko‘mak uchun minnatdorlik bildirdi.
“Pandemiya sharoitida sog‘liqni saqlashga yangi masofaviy texnologiyalarni joriy etish zarurati ham ortib bormoqda. Shu munosabat bilan Telemeditsina sohasidagi hamkorlik konsepsiyasini ishlab chiqishni maqsadga muvofiq, deb hisoblaymiz”, — dedi O‘zbekiston Prezidenti.
Izoh (0)