Xalqaro savdo markazi va Yevropa Ittifoqi O‘zbekistonga Jahon savdo tashkilotiga (JST) a’zo bo‘lish uchun hujjatlar, sanitariya me’yorlari va savdo protseduralarini tayyorlashda yordam beradi, deya xabar bermoqda “Gazeta.uz”
Qayd etilishicha, Xalqaro savdo markazi (XSM) Yevropa Ittifoqining yangi “O‘zbekistonning Jahon savdo tashkilotiga qo‘shilishi jarayoniga ko‘maklashish” loyihasini amalga oshirmoqda.
Loyiha 10-noyabr kuni O‘zbekiston investitsiya va tashqi savdo vazirligi bilan birgalikda onlayn-tadbir davomida boshlandi.
Loyiha O‘zbekiston hukumatining muzokaralardagi pozitsiyalarini rivojlantirishda va JSTga kirish jarayoni uchun zarur bo‘lgan hujjatlarni tayyorlashda qo‘llab-quvvatlashga qaratilgan.
Mamlakatning ijro etuvchi va qonun chiqaruvchi hokimiyatlari O‘zbekistonning yangi xalqaro majburiyatlariga muvofiq talab qilinadigan alohida tarmoq qonunlari va qoidalarini ishlab chiqishda yordam beradi.
Loyiha, shuningdek, savdo siyosatini ishlab chiqish va biznes bilan shug‘ullanadigan davlat amaldorlari orasida JSTga a’zo bo‘lish jarayoni, uning afzalliklari va tashkilotning qonunchilik bazasi to‘g‘risida xabardorlikni oshiradi.
Bundan tashqari, ushbu loyiha O‘zbekistonning JST qoidalariga, xususan sanitariya va fitosanitariya tadbirlari, savdodagi texnik to‘siqlar va savdo-sotiqni soddalashtirish to‘g‘risidagi bitimlarga rioya qilish bo‘yicha salohiyatini oshirishga qaratilgan.
“O‘zbekiston XSMning ko‘p yillik tajribasidan foydalanib, eng kam rivojlangan va rivojlanayotgan mamlakatlarga Jahon savdo tashkilotiga keng ko‘lamli texnik xizmatlar ko‘rsatish orqali JSTga a’zo bo‘lish jarayonida yordam beradi”,– deyiladi bayonotda.
Loyihaning besh yillik davrida XSM Yevropa Ittifoqining O‘zbekistondagi Delegatsiyasi va Investitsiya va tashqi savdo vazirligi bilan bevosita o‘zaro aloqada bo‘ladi.
Qayd etilishicha, loyiha doirasida O‘zbekistonni Jahon savdo tashkilotiga a’zo bo‘lish bo‘yicha ishchi guruhning 15 yillik tanaffusdan so‘ng 7-iyul kuni bo‘lib o‘tgan to‘rtinchi yig‘ilishi bo‘lib o‘tdi. Ushbu muhim voqea O‘zbekistonning muzokaralar stoliga qaytishini, hukumatning JSTga a’zo bo‘lish majburiyatini va sa’y-harakatlarini belgilab berdi.
Eslatib o‘tamiz, 2019-yil iyul oyida O‘zbekiston tomoni JSTga mamlakatning ushbu tashkilotga qo‘shilishi to‘g‘risidagi arizani ko‘rib chiqish uchun tashqi savdo rejimi to‘g‘risidagi yangilangan memorandumni taqdim etdi. Tashqi ishlar vazirligi ma’lumotlariga ko‘ra, O‘zbekiston Jahon savdo tashkilotiga a’zo bo‘lganida iqtisodiyoti rivojlanayotgan mamlakatlarga taqdim etiladigan imtiyozlarini olmoqchi.
Avvalroq O‘zbekistonning Jahon savdo tashkilotiga a’zo bo‘lishi uchun idoralararo komissiya tuzilgani xabar qilingandi.
Izoh (0)