Ўзбекистон Президенти Шавкат Мирзиёев Шанхай Ҳамкорлик Ташкилотига аъзо давлатлар раҳбарлари кенгашининг видеоанжуман шаклида ўтган мажлисида нутқ сўзлади. Бу ҳақда Президент матбуот хизмати хабар берди.
Ўз нутқида Ўзбекистон Президенти халқаро ҳамкорликни мустаҳкамлаш ва коронавирус пандемияси сабабли юзага келган пасайишдан кейин ташкилот мамлакатларининг иқтисодиётини тиклашга қаратилган бир қатор ташаббусларни илгари сурди.
«Бизнинг асосий мақсадимиз савдо ва иқтисодий алоқаларни, ишлаб чиқариш кооперацияларини жонлантириш. Аминманки, ушбу мақсадга эришишнинг энг самарали усули инқирозга қарши дастурларни бирга амалга ошириш, ўзаро савдо-сотиқдаги тўсиқларни йўқ қилиш ва божхона талабларини соддалаштиришдир», — деди Шавкат Мирзиёев.
Ўзбекистон Президентининг қайд этишича, пандемия шароитида ташкилот доирасидаги алоқалар савдо-иқтисодий ҳамкорлик дастурини амалга ошириш бўйича ШҲТнинг асосий режаси бўлиши керак.
«Озиқ-овқат хавфсизлиги соҳасидаги ҳамкорлик дастурини амалга ошириш бўйича аниқ чора-тадбирларни ишлаб чиқиш муҳим ҳаётий аҳамиятга эга», — деди Ўзбекистон Президенти.
«Бугунги шароитда биргаликдаги саъй-ҳаракатларни аҳолининг эҳтиёжманд қатламларини қўллаб-қувватлаш ва камбағалликни қисқартиришга йўналтириш муҳимдир. Бу борадаги ҳамкорлигимизни мувофиқлаштириш мақсадида камбағалликка қарши курашиш учун масъул вазирлик ва идоралар раҳбарларининг йиғилишларини ўтказиш механизмини яратиш зарур, деб ҳисоблайман.
ШҲТга аъзо давлатларнинг мазкур йўналишдаги ҳамкорлиги дастурини ишлаб чиқиш, шунингдек, уни амалга ошириш бўйича келишилган чораларни ишлаб чиқиш учун Ўзбекистонда халқаро форум ўтказишни таклиф этаман», — дея ўз таклифини билдирди давлат раҳбари.
Ўзбекистон Президенти коронавирус пандемияси рақамлаштириш жараёнини тезлаштирганини таъкидлади. «Ахборот технологиялари иқтисодий ўсишнинг драйвери бўлади», — дея қўшимча қилди давлат раҳбари.
Шунингдек, Шавкат Мирзиёев мазкур саммитда рақамли иқтисодиёт соҳасидаги ҳамкорликка доир баёнот ўз вақтида қабул қилинаётганини маълум қилди.
«Ўзаро келишилган ўқув дастурлари асосида аҳолини ўқитиш, соҳа мутахассисларини тайёрлашга қаратилган ШҲТнинг рақамли саводхонликни ривожлантириш дастурини ишлаб чиқишни таклиф этаман», — деди Шавкат Мирзиёев.
Ўзбекистон Президенти бугун инсоният илгари маълум бўлмаган инфекциялар билан дуч келаётганини ва уларга қарши курашиш кундалик турмушимизнинг бир қисмига айланаётганини таъкидлади.
«Шу муносабат билан бугунги саммитда Эпидемия таҳдидларига қарши кураш бўйича қўшма чора-тадбирларнинг комплекс режаси қабул қилинишини олқишлаймиз. Унинг амалга оширилишини таъминлаш, хавфли юқумли касалликларнинг тарқалиши тўғрисидаги ахборот билан самарали алмашинувни йўлга қўйиш муҳимдир», — деди давлат раҳбари.
«Мамлакатларимизнинг соҳага ихтисослашган шифохоналари ўртасида натижадор ҳамкорликни йўлга қўйиш мақсадида Эпидемияга олиб келувчи касалликларга қарши кураш бўйича тиббиёт муассасалари тармоғини яратишни таклиф этамиз», — дея таклиф билдирди Шавкат Мирзиёев.
Президентнинг қайд этишича, ушбу тармоқ доирасида юқумли касалликларни диагностика, профилактика қилиш ва даволаш бўйича тажриба алмашиш, врачлар қўшма гуруҳлари фаолиятини ташкил этиш ва уларни тайёрлашга қаратилган ўзаро манфаатли лойиҳаларни амалга ошириш мумкин.
Шавкат Мирзиёев Россия ва Хитойга коронавирус инфекциясига қарши курашда кўрсатилган катта ёрдам ва кўмак учун миннатдорлик билдирди.
«Пандемия шароитида соғлиқни сақлашга янги масофавий технологияларни жорий этиш зарурати ҳам ортиб бормоқда. Шу муносабат билан Телемедицина соҳасидаги ҳамкорлик концепциясини ишлаб чиқишни мақсадга мувофиқ, деб ҳисоблаймиз», — деди Ўзбекистон Президенти.
Изоҳ (0)