“O‘zbekiston Tog‘li Qorabog‘da o‘t ochish to‘liq to‘xtatilganini olqishlaydi” — Shavkat Mirziyoyev

Shavkat Mirziyoyev O‘zbekiston Tog‘li Qorabog‘da o‘t ochish to‘liq to‘xtatilganini olqishlashini aytdi. Bu haqda Prezident 10-noyabr kuni Shanxay hamkorlik tashkilotiga a’zo davlatlar rahbarlari kengashining videoanjuman shaklida o‘tkazilgan majlisida bildirdi.

“Biz Tog‘li Qorabog‘ nizo hududida o‘t ochishni va barcha harbiy harakatlarni to‘liq to‘xtatishga doir, Rossiyaning faol ko‘magi bilan erishilgan kelishuvlarni olqishlaymiz. Ushbu mintaqada tinch hayot va barqarorlik yaqin vaqt ichida qayta tiklanishiga umid bildiramiz”, — degan davlat rahbari.

Prezident, shuningdek, O‘zbekiston Qirg‘izistonning barqaror rivojlanish yo‘lidagi intilishini har tomonlama qo‘llab-quvvatlashini ham bildirgan.

Shanxay hamkorlik tashkilotiga a’zo davlatlar rahbarlari kengashining majlisi 10-noyabr kuni videoanjuman shaklida o‘tkazildi. Rossiya raisligida o‘tkazilgan ushbu uchrashuv kun tartibidan yangi global xatar va tahdidlarning kuchayishi sharoitida ShHT doirasidagi ko‘p qirrali hamkorlikni yanada mustahkamlash masalalari o‘rin olgan.