Italiyalik politsiyachilar Lamborghini Huracan sharofati bilan bemorning hayotini saqlab qoldi. 610 ot kuchiga ega xizmat kupesi donorlik buyragini Paduyadan Rimga olib kelgan — superkar tez yordam mashinalariga besh soat ketadigan 500 kilometrni uch soatda bosib o‘tgan, deb yozadi Motor.
Italiya politsiyasining donorlik organlarini tashishga mo‘ljallangan Lamborghini Huracan mashinasining old yukxonasi muzlatkichga aylantirilgan, shuningdek,uning ichidan maxsus defibrillyator ham o‘rin olgan.
Bundan tashqari, politsiya kupesi oddiy Huracan LP-610’dan shakli, old, orqa, yon va tepa qismidagi diodli ko‘k maxsus signallari, katta antennasi va yo‘l harakati qoidalarining buzilishini qayd etadigan foto-video kameralar jamlanmasi bilan ajralib turadi.
Italiya politsiyasiga Huracan 2014-yilda, taqdimotidan bir necha oy o‘tib sovg‘a qilingan — ikki eshikli mashina kalitlarini mahalliy politsiya boshlig‘iga Lamborghini rahbari sovg‘a qilgan. Huracan idoraning garajidagi boshqa bir suparkarni — Gallardo’ning o‘rnini egallagan.
Eslatib o‘tamiz, 2017-yilda Dubay politsiyasi eng tezkor avtomobili tufayli Ginnessning rekordlar kitobiga kirgan edi. O‘shanda Dubay politsiyasi xizmatidagi Bugatti Veyron’ning eng yuqori tezligi soatiga 407 kilometrni tashkil qilgan.
Izoh (0)