Buxoro viloyatida “VAZ-21011” mashinasini jarima maydonidan chiqarib berish va avtomobilning dvigatel raqami haqida ma’lumotnoma tayyorlab berish evaziga viloyat IIB YHXB inspektoriga pora taklif qilgan haydovchi qo‘lga olindi. Bu haqda Buxoro viloyati IIB axborot xizmati xabar qilgan.
Xabarda qayd etilishicha, 2020-yilning 19-oktabr kuni Buxoro viloyati Ichki ishlar boshqarmasi YHXB inspektori serjant S.B. viloyat IIB YHXB boshlig‘i nomiga bildirgi bilan murojaat qilib, unda V.S. ismli shaxsning “VAZ-21011” mashinasini jarima maydonidan chiqarib berish hamda “Avtotransport vositasini qayd etish guvohnomasi”da ko‘rsatilgan dvigatel raqami bilan avtomashina dvigatelidagi zavod raqamlari mos ekanligi haqida ma’lumotnoma yozib berishi evaziga 400 ming so‘m miqdoridagi pullarni pora tariqasida taklif qilayotgani sababli unga nisbatan qonuniy chora ko‘rishni so‘ragan.
Serjant S.B.ning bildirgisi asosida Ichki ishlar vazirligi O‘z xavfsizligi boshqarmasi Buxoro viloyati bo‘yicha bo‘limi va Buxoro viloyati prokuraturasi xodimlari tomonidan o‘tkazilgan tezkor tadbirda fuqaro V.S. serjant S.B.ning xizmat xonasiga kelib, 400 ming so‘mni pora sifatida bergan vaqtida ushlangan. Ushbu holat tegishli tartibda rasmiylashtirilgan.
Holat yuzasidan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilib, hozirda V.S.ga nisbatan dastlabki tergov harakatlari olib borilmoqda, deyiladi xabarda.
Avval Toshkent viloyatida YPX komandiriga 350 dollar pora taklif qilgan shaxs qo‘lga olingani, Samarqandda Malibu’sini jarima maydonchasidan chiqarib berish uchun IIB xodimiga 400 dollar taklif qilgan haydovchi ushlangani, Shahrisabzda mashinasini jarima maydonidan chiqarish uchun tuman YHXB boshlig‘iga pora berayotgan fuqaro qo‘lga tushgani haqida xabarlar berilgan.
Izoh (0)