Jizzax viloyati Sharof Rashidov tumani hududidan o‘tuvchi Jizzax–Zafarobod 4-M-36 avtomobil yo‘lining 7-kilometrida ikkita Howo yuk avtomobillari to‘qnashuvi sodir bo‘lgan. Bu haqda Yo‘l harakat xavfsizligi bosh boshqarmasi axborot xizmati xabar qildi.
Jizzax viloyati IIB YHXB katta inspektori Erkin Ochilovning ma’lum qilishicha, birlamchi ma’lumotlarga ko‘ra, ushbu YTH sodir bo‘lishining asosiy sababi ikkala haydovchining bir mahallada yashashi va o‘zaro tanish sifatida hazillashgani bo‘lishi mumkin. Beozor boshlangan hazil oqibatida yuk ortilgan mashinalar boshqaruvi izdan chiqqan va ikki Howo bir-biriga urilgan.
Mashinalardan biri ichida ketayotgan yo‘lovchining so‘zlariga ko‘ra, ikki yuk avtomobili to‘g‘rima-to‘g‘ri kelgan, keyin boshqaruv yo‘qotilishi oqibatida YTH sodir bo‘lgan. Boshqarma e’lon qilgan videotasvirlarda mashina salonida tiqilib qolgan haydovchilarning Favqulodda vaziyatlar boshqarmasi xodimlari tomonidan qutqarib olinayotgani aks etgan.
Mazkur holat yuzasidan surishtiruv harakatlari olib borilmoqda, deyiladi YHXBB xabarida.
Mavzuga doir:
Izoh (0)