Samarqandda Trailblazer rusumli xizmat avtomobilini olib qochishga uringan fuqaroga nisbatan jinoiy ish ochildi. Bu haqda IIV Tergov departamenti xabar berdi.
Ma’lum qilinishicha, “Jomboy don mahsulotlari” AJ direktori Q.Sh. IIBga korxona haydovchisi A.B. qora rangli Trailblazer mashinasini olib qochishga uringani to‘g‘risidagi ariza bilan murojaat qilgan.
A.B. ishchilar tortishuvi vaqtida Trailblazer’ning eshigi ochiqligi va kaliti o‘zida turganligidan foydalanib, avtomashinani olib qochmoqchi bo‘lgan.
Ammo qo‘riqchilar chiqish darvozalarini berkitib qo‘yilganligi sababli avtomobilni olib qocha olmay, boshqaruvni yo‘qotgan. So‘ng korxonaning ta’mirlash ishlari olib borilayotgan qismiga to‘qnashib, avtomashinaga shikast yetkazgan va voqea joyidan qochib ketgan.
Ta’kidlanishicha, korxona direktori Q.Sh. janjalni ajratishda ishtirok etib, yengil tan jarohati olgan.
Holat yuzasidan A.B.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilib, unga nisbatan qamoqqa olish tarzidagi ehtiyot chorasi qo‘llanilgan.
Hodisa sodir bo‘lgan joyni ko‘zdan kechirish jarayonida mavjud video kuzatuv xotiralarida saqlangan tasvirlar DVD diskka yozilib, ashyoviy dalil tariqasida rasmiylashtirib olingan.
Izoh (0)