Interlogic Outsourcing Inc. kompaniyasining sobiq egasi, hozirda firibgarlikda ayblangan Najib Xonning avtomobil kolleksiyasi RM Sotheby’s auksioni orqali sotuvga qo‘yilishi to‘g‘risida xabar berilgandi. Ta’kidlanishicha, turli davrlarga oid modellar o‘rin olgan 240 ta mashina 44,4 million dollarga baholagan. Biroq ushbu pullar Xonning qarzlaridan qutulishi uchun yetarli emas, deb yozadi Motor.
Kolleksiyaning bu qadar qimmatligiga sabab Xon ko‘pchilik orzu qilgan noyob modellarni yig‘gani bilan izohlanmoqda. Masalan, firibgarning garajidan 15 nusxada yaratilgan 1953-yilgi Fiat 8V Supersonic’dan biri, 1917-yilgi Hudson, bir juft Tatra T87, 1927-yilgi Bugatti Type 35, to‘qqizta modeldan biri hisoblangan Alfa Romeo TZ3 Stradale Zagoto va hatto 1936-yilgi White Model 706 Glacier National Park o‘rin olgan.
The Drive o‘z navbatida Xonning kolleksiyasidagi avtomobillarning aniq narxi haqidagi ma’lumotlar bilan bo‘lishgan. Masalan, Ferrari 225 Sport Berlinetta 2,8 million dollarga, Fiat 8V Supersonic — 2,04 million dollarga, 1955-yilda ishlab chiqarilgan Jaguar’ning har biri 1,3—1,9 million dollardan sotilgan.
Avtomobillar kolleksiyasini sotishdan tushgan millionlar Xonning qarzlaridan qutulishiga yetmaydi. Shuningdek, uning kompaniyasi noqonuniy yo‘l bilan 90 million dollar o‘zlashtirganlikda ayblanmoqda va tekshiruvlar davomida tadbirkor noqonuniy yo‘l bilan yana 32 million dollarni qo‘lga kiritgani aniqlangan.
Izoh (0)