Самарқандда Trailblazer русумли хизмат автомобилини олиб қочишга уринган фуқарога нисбатан жиноий иш очилди. Бу ҳақда ИИВ Тергов департаменти хабар берди.
Маълум қилинишича, «Жомбой дон маҳсулотлари» АЖ директори Қ.Ш. ИИБга корхона ҳайдовчиси А.Б. қора рангли Trailblazer машинасини олиб қочишга урингани тўғрисидаги ариза билан мурожаат қилган.
А.Б. ишчилар тортишуви вақтида Trailblazer’нинг эшиги очиқлиги ва калити ўзида турганлигидан фойдаланиб, автомашинани олиб қочмоқчи бўлган.
Аммо қўриқчилар чиқиш дарвозаларини беркитиб қўйилганлиги сабабли автомобилни олиб қоча олмай, бошқарувни йўқотган. Сўнг корхонанинг таъмирлаш ишлари олиб борилаётган қисмига тўқнашиб, автомашинага шикаст етказган ва воқеа жойидан қочиб кетган.
Таъкидланишича, корхона директори Қ.Ш. жанжални ажратишда иштирок этиб, енгил тан жароҳати олган.
Ҳолат юзасидан А.Б.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилиб, унга нисбатан қамоққа олиш тарзидаги эҳтиёт чораси қўлланилган.
Ҳодиса содир бўлган жойни кўздан кечириш жараёнида мавжуд видео кузатув хотираларида сақланган тасвирлар DVD дискка ёзилиб, ашёвий далил тариқасида расмийлаштириб олинган.
Изоҳ (0)