Birinchi marta koronavirusga chalinganda immuniteti past bo‘lgan kishilar kasallikka qayta chalinishi mumkin. “RBK”ning yozishicha, bu haqda Rossiyaning Gamaleya nomidagi Milliy epidemiologiya va mikrobiologiya ilmiy-tadqiqot markazi virusologi, professor Anatoliy Altshteyn ma’lum qildi.
Uning aytishicha, qayta kasallanish ehtimolini immunitetning kasallikka qarshilik kurashishidan taxmin qilish mumkin. “Agar birinchi kasallanishda immunitet juda zaif bo‘lgan bo‘lsa, bu kasallikning simptomsiz shaklida ham kuzatilishi mumkin, u holda odam qayta kasallanishi mumkin”, — deya ogohlantirgan virusolog.
Altshteynning so‘zlariga ko‘ra, COVID-19 bilan qayta kasallanish birlamchi kasallanishdan kamroq uchraydi. Shu bilan birga, ikkinchi marta kasallangan kishilar infeksiyani birinchisiga qaraganda og‘irroq o‘tkazishi mumkinligini, ammo hozircha bu masala yetarlicha o‘rganilmaganini ta’kidlab o‘tgan.
Virusolog kasallikni boshidan o‘tkazib bo‘lgan barcha kishilarni sog‘lom odam amal qilishi kerak bo‘lgan ehtiyot chorasiga amal qilishga chaqirgan.Avvalroq Rossiya Sog‘liqni saqlash vazirligi bosh infeksionisti, Sechenov universiteti professori Vladimir Chulanov ham koronavirus bilan qayta kasallanish ehtimoli kamligi, lekin kasallikdan tuzalgan bemorning immuniteti past yoki antitanalar yetarli miqdorda bo‘lmasa, shunday bo‘lishi ehtimoli mavjudligini aytgandi. Rossiyalik virusolog Aleksandr Chepurnov esa koronavirusga qarshi immunitet olti oy saqlanib qolishini ma’lum qilgan.
Birinchi marotaba koronavirus bilan qayta kasallanish holati 24-avgustda ma’lum bo‘lgandi. Gonkong universiteti tadqiqotchilari 33 yoshli erkak birinchi kasallanishdan deyarli besh oy o‘tgach yana koronavirusga chalingan. Keyinchalik amerikalik shifokorlar ham koronavirus bilan qayta kasallanish holati haqida xabar berdi. U AQShning Nevada shtati, Rino shahrida yashovchi 25 yoshli shaxs bo‘lib, mamlakatda koronavirusga qayta chalingan birinchi bemor bo‘ldi. Bemorda ikkinchi marta kasallik simptomlari birinchisiga qaraganda og‘irroq bo‘lgan — kislorod yetishmasligi tufayli shoshilinch yordamga murojaat qilishga to‘g‘ri kelgan.
Qozog‘istonda ham noyabr oyida koronavirus bilan qayta kasallanish bo‘yicha birinchi holat qayd etildi
Oktabr oyi oxirida O‘zbekistonda Koronavirusga qarshi kurash shtabi a’zosi Nargiza Nurullayeva O‘zbekistonda COVID-19 bilan qayta kasallanish holatlari qayd etilayotganini ma’lum qilgan edi. Biroq Koronavirusga qarshi kurash shtabining boshqa a’zosi Sevara Ubaydullayeva bir haftadan keyin shtabga koronavirus bilan qayta kasallanish holati haqida ma’lumot kiritilmaganini aytdi.
Izoh (0)