2-noyabr kuni Venada sodir etilgan terakt ishida hibsga olinganlar orasida Rossiya fuqarolari ham bor, deb yozmoqda Meduza. Bu haqda Avstriya poytaxti politsiyasi rahbari Gerxard Pyurstlga tayanib, Die Presse gazetasi xabar bergan.
Avvalroq teraktni tergov qilish doirasida terrorchilik tashkilotida ishtirok etishda gumonlangan 14 kishi hibsga olingani ma’lum bo‘lgan edi. Pyurstlning so‘zlariga ko‘ra, ular 18 yoshdan 28 yoshgacha bo‘lgan shaxslar bo‘lib, ularning ayrimlari ikki fuqarolikka, jumladan, Bangladesh, Makedoniya, Turkiya va Rossiya fuqaroligiga ega.
Xabarda aytilishicha, bundan avval Rossiyaning Avstriyadagi elchisi Dmitriy Lyubinskiy “Bolqon mamlakatlari, Islom dunyosi va Shimoliy Kavkaz”dan bo‘lganlar hibsga olingani haqida ma’lum qilgan.
O‘z navbatida Avstriya ichki ishlar vaziri Karl Nexammer hozircha terrorchi bir o‘zi harakat qilgan, degan versiya tasdiqlanayotganini bildirgan. Shuningdek, gumondor Slovakiyada o‘q-dorilar sotib olishga harakat qilgani, bu haqda Slovakiya maxsus xizmatlari Avstriyani ogohlantirganini haqida aytgan. Nexammer maxsus xizmatlar aloqasida “nimadir bo‘lib” bu xabar e’tiborsiz qoldirilganini tan olgan.
Eslatib o‘tamiz, 2-noyabr oqshomida sodir bo‘lgan Venadagi teraktda besh kishi halok bo‘lgan, 22 kishi turli darajada jarohat olgan. Politsiya hujum uyushtirganlardan birini otib o‘ldirgan. U 20 yoshli Feyzulay Kuytim bo‘lib, Suriyaga ketib, IShID terrorchilariga qo‘shilmoqchi bo‘lgani uchun 22 oylik qamoq jazosiga hukm qilingan biroq, muddatidan ilgari shartli ozod qilingan. IShID ushbu terakt uchun mas’uliyatni o‘z zimmasiga olgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)