Биринчи марта коронавирусга чалинганда иммунитети паст бўлган кишилар касалликка қайта чалиниши мумкин. «РБК»нинг ёзишича, бу ҳақда Россиянинг Гамалея номидаги Миллий эпидемиология ва микробиология илмий-тадқиқот маркази вирусологи, профессор Анатолий Альтштейн маълум қилди.
Унинг айтишича, қайта касалланиш эҳтимолини иммунитетнинг касалликка қаршилик курашишидан тахмин қилиш мумкин. «Агар биринчи касалланишда иммунитет жуда заиф бўлган бўлса, бу касалликнинг симптомсиз шаклида ҳам кузатилиши мумкин, у ҳолда одам қайта касалланиши мумкин», — дея огоҳлантирган вирусолог.
Альтштейннинг сўзларига кўра, COVID-19 билан қайта касалланиш бирламчи касалланишдан камроқ учрайди. Шу билан бирга, иккинчи марта касалланган кишилар инфекцияни биринчисига қараганда оғирроқ ўтказиши мумкинлигини, аммо ҳозирча бу масала етарлича ўрганилмаганини таъкидлаб ўтган.
Вирусолог касалликни бошидан ўтказиб бўлган барча кишиларни соғлом одам амал қилиши керак бўлган эҳтиёт чорасига амал қилишга чақирган.Аввалроқ Россия Соғлиқни сақлаш вазирлиги бош инфекционисти, Сеченов университети профессори Владимир Чуланов ҳам коронавирус билан қайта касалланиш эҳтимоли камлиги, лекин касалликдан тузалган беморнинг иммунитети паст ёки антитаналар етарли миқдорда бўлмаса, шундай бўлиши эҳтимоли мавжудлигини айтганди. Россиялик вирусолог Александр Чепурнов эса коронавирусга қарши иммунитет олти ой сақланиб қолишини маълум қилган.
Биринчи маротаба коронавирус билан қайта касалланиш ҳолати 24 августда маълум бўлганди. Гонконг университети тадқиқотчилари 33 ёшли эркак биринчи касалланишдан деярли беш ой ўтгач яна коронавирусга чалинган. Кейинчалик америкалик шифокорлар ҳам коронавирус билан қайта касалланиш ҳолати ҳақида хабар берди. У АҚШнинг Невада штати, Рино шаҳрида яшовчи 25 ёшли шахс бўлиб, мамлакатда коронавирусга қайта чалинган биринчи бемор бўлди. Беморда иккинчи марта касаллик симптомлари биринчисига қараганда оғирроқ бўлган — кислород етишмаслиги туфайли шошилинч ёрдамга мурожаат қилишга тўғри келган.
Қозоғистонда ҳам ноябрь ойида коронавирус билан қайта касалланиш бўйича биринчи ҳолат қайд этилди
Октябрь ойи охирида Ўзбекистонда Коронавирусга қарши кураш штаби аъзоси Наргиза Нуруллаева Ўзбекистонда COVID-19 билан қайта касалланиш ҳолатлари қайд этилаётганини маълум қилган эди. Бироқ Коронавирусга қарши кураш штабининг бошқа аъзоси Севара Убайдуллаева бир ҳафтадан кейин штабга коронавирус билан қайта касалланиш ҳолати ҳақида маълумот киритилмаганини айтди.
Изоҳ (0)