3-noyabr kuni AQShda mamlakat prezidenti saylovlari bo‘lib o‘tdi, shuningdek, vakillar palatasi va senatning uchdan bir qismi saylovlari ham o‘tkazildi. Bundan tashqari, ko‘pchilik shtatlarda shtat bayrog‘idan tortib, gallyutsinogen (gallyutsinatsiya chaqiruvchi) qo‘ziqorinlargacha bo‘lgan ko‘plab masalalar bo‘yicha mahalliy ovoz berish va referendumlar bo‘lib o‘tdi. Bu haqda “RBK” xabar bermoqda.
Missisipi shtatida aholi seshanba kuni referendumda shtatning yangi bayrog‘i uchun ovoz berdi. Yakunda u 68 foiz ovoz bilan tasdiqlandi. Bayroqning markazida ancha vaqtlardan buyon shtatning va unda yashovchi aholining mehmondo‘stligi ramzi bo‘lib kelgan magnoliya guli tasvirlangan. Bundan avvalgi bayroq 126 yil davomida amal qilgan, unda Konfederatsiya bayrog‘i tasvirlangan edi.
Arizonada marixuanani rekreatsion maqsadlarda (tibbiy bo‘lmagan maqsadda, rohat olish maqsadida) iste’mol qilish qonuniylashtirildi. Uni 21 yoshdan oshganlar qabul qilishi va saqlashi mumkin. Bir kishi ko‘pi bilan oltita kannabis o‘simligini yetishtirishi va 1 unsiyagacha (28,3 gramm) marixuana saqlashi mumkin. Bunday jinoyatlar uchun muqaddam sudlanganlar sud arxivlaridan bu haqdagi qaydlarni o‘chirib tashlashni talab qila oladi. Arizona kattalarning qonuniy tarzda marixuana iste’mol qilishiga ruxsat berilgan 13-shtat bo‘ldi. Xuddi shunday tashabbus 3-noyabr kuni Janubiy Dakota, Montana va Nyu-Jersida ham ma’qullandi.
Nebraska va Yutada aholi shtat konstitutsiyasidan sudlangan jinoyatchilar uchun jazo sifatida qullikka sotish chorasini qo‘llash imkonini beradigan qismni olib tashlash uchun ovoz berdi.
Luizianada shtat konstitutsiyasiga tuzatish kiritildi. Endi hujjatda konstitutsiya homilani oldirish huquqi yoki homilani oldirishni moliyalashtirish huquqini himoya qilmasligi to‘g‘ridan to‘g‘ri yozib qo‘yiladi. Tuzatish kiritishni yoqlab 60 foizdan ortiq saylovchi ovoz berdi.
Floridada aholi kelasi olti yil davomida eng kam ish haqini 15 dollargacha ko‘tarish uchun ovoz berdi. Sentabrdan eng kam soatbay to‘lov 8,56 dollardan 10 dollargacha oshiriladi, keyin esa 2026-yil sentabriga qadar inflyatsiyani hisobga olgan holda 1 dollardan o‘sib boradi.
Rod-Aylend shtatida shtatning rasmiy nomlanishi qisqartirildi. Bungacha u “Rod-Aylend shtati va Providens plantatsiyalari” degan nomga ega edi, ammo ovoz berish chog‘ida aholi bu nomning ikkinchi qismini olib tashlashga qaror qildi. “Plantatsiyalar” so‘zi qullar mehnat qiladigan muayyan bir joyni anglatmagan bo‘lsa-da, qisqartirish tarafdorlari mamlakat irqiy diskriminatsiyaga qarshi kurashayotgan bir paytda bu haqoratli eshitilishini aytgan.
Oregon AQShda gallyutsinogen qo‘ziqorinlar qonuniylashtirilgan birinchi shtat bo‘ldi. Yangi qonunchilik doirasida qo‘ziqorinlarni davolash maqsadlarida iste’mol qilishga ruxsat berildi. Ikki yil ichida shtat qo‘ziqorinlarni qabul qilish qanday tartibga solinishini va ularni tayinlash uchun shifokorlar qanday malakaga ega bo‘lishi kerakligini belgilashi zarur bo‘ladi.
So‘nggi ma’lumotlarga ko‘ra, Bayden 95 foiz byulletenlar hisob-kitobi bo‘yicha Viskonsinda g‘alaba qozonmoqda — unda 49,6 foiz ovoz. Trampda esa 48,9 foiz. Michigandagi 99 foiz byulletenlar hisobi bo‘yicha ham Demokratlar partiyasi nomzodi yetakchi — 49,9 foiz.
Shu bilan birga, Trampning saylovoldi shtabi suddan Michigan va Pensilvaniyadagi ovozlarni hisoblash jarayonini to‘xtatishni, shuningdek, Viskonsinda natijalarni qayta ko‘rib chiqishni talab qilgan.
Avvalroq Donald Tramp Oq uyda tarafdorlari oldida chiqish qilib, “biz barchasini yutdik” degan edi.
Izoh (0)