AQShning amaldagi prezidenti Donald Tramp mamlakat rahbarini saylashda muhim ahamiyatga ega to‘rtta shtatda g‘alaba qozonganini ma’lum qildi. Bu haqda u o‘zining Twitter’dagi sahifasiga yozib qoldirgan.
“Saylovchilarning ovozlari uchun qonuniy kuzatuvchilarga ruxsat berilmayotgan Pensilvaniyada g‘alabaga erishganimizni e’lon qildik. Jorjiya va Shimoliy Karolinada Tramp yetakchilik qilmoqda. Bundan tashqari, Michiganda katta miqdorda byulletenlar yashirin ravishda tashlangani tasdiqlansa, u yerdagi g‘alabamizni ham e’lon qilamiz”, — deb yozadi Tramp.
Shu bilan birga, dastlabki hisob-kitoblar Michiganda demokrat Jo Baydenning g‘alabasini ko‘rsatmoqda, u 49,9 foiz ovoz to‘plagan. Amaldagi prezident esa raqibidan 1,3 foizga orqada.
Viskonsindagi 95 foiz ovozning hisob-kitobi bo‘yicha ham Bayden yetakchi — unda 49,6 foiz ovoz. Trampda esa 48,9 foiz, uning jamoasi ushbu shtatdagi saylov natijalarini qayta ko‘rib chiqish niyatida — AQSh qonunlari bo‘yicha nomzodlar o‘rasidagi farq 1 foizdan kam bo‘lsa, buning imkoni bor.
Hozircha Shimoliy Karolina, Jorjiya, Nevada, Pensilvaniya va Alyaskadagi ovozlar rasman hisoblanmagan. Saylov natijalariga faqat dastlabki to‘rtta shtat ta’sir ko‘rsatadi (Alyaska uchta saylovchi bilan qatnashmoqda). Fox News telekanali ma’lumotlariga ko‘ra, Tramp Shimoliy Karolina, Pensilvaniya va Jorjiyada yetakchilik qilmoqda. Nevada esa hozircha Bayden foydasiga ovoz bermoqda. Dastlabki prognozlar bo‘yicha, demokrat hozirda 264 ovoz to‘plagan. Agarda oltita saylovchi vakiliga ega Nevadada Bayden g‘alaba qozonsa, AQShning keyingi prezidentiga aynan u aylanadi.
Eslatib o‘tamiz, avvalroq AQSh prezidenti Donald Tramp Oq uyda saylovlarda berilgan ovozlarni hisoblash fonida o‘z tarafdorlari oldida chiqish qilib, g‘alaba qozonganini e’lon qilgandi.
Izoh (0)