3 ноябрь куни АҚШда мамлакат президенти сайловлари бўлиб ўтди, шунингдек, вакиллар палатаси ва сенатнинг учдан бир қисми сайловлари ҳам ўтказилди. Бундан ташқари, кўпчилик штатларда штат байроғидан тортиб, галлюциноген (галлюцинация чақирувчи) қўзиқоринларгача бўлган кўплаб масалалар бўйича маҳаллий овоз бериш ва референдумлар бўлиб ўтди. Бу ҳақда «РБК» хабар бермоқда.
Миссисипи штатида аҳоли сешанба куни референдумда штатнинг янги байроғи учун овоз берди. Якунда у 68 фоиз овоз билан тасдиқланди. Байроқнинг марказида анча вақтлардан буён штатнинг ва унда яшовчи аҳолининг меҳмондўстлиги рамзи бўлиб келган магнолия гули тасвирланган. Бундан аввалги байроқ 126 йил давомида амал қилган, унда Конфедерация байроғи тасвирланган эди.
Аризонада марихуанани рекреацион мақсадларда (тиббий бўлмаган мақсадда, роҳат олиш мақсадида) истеъмол қилиш қонунийлаштирилди. Уни 21 ёшдан ошганлар қабул қилиши ва сақлаши мумкин. Бир киши кўпи билан олтита каннабис ўсимлигини етиштириши ва 1 унсиягача (28,3 грамм) марихуана сақлаши мумкин. Бундай жиноятлар учун муқаддам судланганлар суд архивларидан бу ҳақдаги қайдларни ўчириб ташлашни талаб қила олади. Аризона катталарнинг қонуний тарзда марихуана истеъмол қилишига рухсат берилган 13-штат бўлди. Худди шундай ташаббус 3 ноябрь куни Жанубий Дакота, Монтана ва Нью-Жерсида ҳам маъқулланди.
Небраска ва Ютада аҳоли штат конституциясидан судланган жиноятчилар учун жазо сифатида қулликка сотиш чорасини қўллаш имконини берадиган қисмни олиб ташлаш учун овоз берди.
Луизианада штат конституциясига тузатиш киритилди. Энди ҳужжатда конституция ҳомилани олдириш ҳуқуқи ёки ҳомилани олдиришни молиялаштириш ҳуқуқини ҳимоя қилмаслиги тўғридан-тўғри ёзиб қўйилади. Тузатиш киритишни ёқлаб 60 фоиздан ортиқ сайловчи овоз берди.
Флоридада аҳоли келаси олти йил давомида энг кам иш ҳақини 15 долларгача кўтариш учун овоз берди. Сентябрдан энг кам соатбай тўлов 8,56 доллардан 10 долларгача оширилади, кейин эса 2026 йил сентябрига қадар инфляцияни ҳисобга олган ҳолда 1 доллардан ўсиб боради.
Род-Айленд штатида штатнинг расмий номланиши қисқартирилди. Бунгача у «Род-Айленд штати ва Провиденс плантациялари» деган номга эга эди, аммо овоз бериш чоғида аҳоли бу номнинг иккинчи қисмини олиб ташлашга қарор қилди. «Плантациялар» сўзи қуллар меҳнат қиладиган муайян бир жойни англатмаган бўлса-да, қисқартириш тарафдорлари мамлакат ирқий дискриминацияга қарши курашаётган бир пайтда бу ҳақоратли эшитилишини айтган.
Орегон АҚШда галлюциноген қўзиқоринлар қонунийлаштирилган биринчи штат бўлди. Янги қонунчилик доирасида қўзиқоринларни даволаш мақсадларида истеъмол қилишга рухсат берилди. Икки йил ичида штат қўзиқоринларни қабул қилиш қандай тартибга солинишини ва уларни тайинлаш учун шифокорлар қандай малакага эга бўлиши кераклигини белгилаши зарур бўлади.
Сўнгги маълумотларга кўра, Байден 95 фоиз бюллетенлар ҳисоб-китоби бўйича Висконсинда ғалаба қозонмоқда — унда 49,6 фоиз овоз. Трампда эса 48,9 фоиз. Мичигандаги 99 фоиз бюллетенлар ҳисоби бўйича ҳам Демократлар партияси номзоди етакчи — 49,9 фоиз.
Шу билан бирга, Трампнинг сайловолди штаби суддан Мичиган ва Пенсильваниядаги овозларни ҳисоблаш жараёнини тўхтатишни, шунингдек, Висконсинда натижаларни қайта кўриб чиқишни талаб қилган.
Аввалроқ Дональд Трамп Оқ уйда тарафдорлари олдида чиқиш қилиб, «биз барчасини ютдик» деган эди.
Изоҳ (0)