Demokratlar partiyasidan AQSh prezidentligiga nomzod Jo Bayden saylovlarda muhim ahamiyatga ega shtatlardan biri — Viskonsinda g‘olib chiqdi, deb xabar beradi Associated Press.
The New York Times va NBC News ma’lumotlariga ko‘ra, Bayden saylovchilarning 49,4 foiz ovoziga ega bo‘lgan, uning raqibi Tramp esa 48,8 foiz. Fox News’ning ma’lum qilishicha, Bayden Viskonsinda 49,6 foiz ovoz to‘plagan bo‘lsa, Trampda ushbu ko‘rsatkich — 49 foiz. Ta’kidlanishicha, nomzodlar o‘rtasidagi farq 0,624 foizni tashkil etgan.
Shuningdek, Bayden AQShning muhim shtatlaridan biri hisoblanuvchi Michiganda ham g‘olib bo‘lgan. Bu haqda Bloomberg 99 foiz byulletenlar hisob-kitobiga tayanib, xabar berdi.
Demokratlar partiyasi nomzodi shtatda saylovchilarning 16 ta ovoziga ega bo‘lgan. CNN ma’lumotlarga ko‘ra, hozirda Baydenda 253 ta ovoz bor, Trampda esa 213 ta. Prezidentlik saylovlarida g‘alaba qozonish uchun esa 270 ta ovoz to‘plash kerak.
Shu bilan birga, Tramp o‘zini Michiganda g‘olib bo‘lgan deb hisoblamoqda. Bundan tashqari, amaldagi prezident Pensilvaniya, Shimoliy Karolina va Jorjiyada ham yetakchilik qilayotganini ma’lum qilgan.
Yuqoridagi shtatlarning barchasi prezidentlik poygasida ziddiyatli va hal qiluvchi hisoblanadi. Trampning jamoasi Viskonsin, Michigan va Pensilvaniyadagi ovozlarning dastlabki hisob-kitoblaridan norozi. Hozirda so‘nggi ikki shtat sudiga da’volar jo‘natilgan bo‘lib, unda Respublikachilar partiyasi vakillarining saylov qutilarini ochish va byulletelarni sanashda ishtirok etishi uchun sharoit yaratib berilmagani ko‘rsatilgan.
Izoh (0)