Amazon asoschisi va dunyodagi eng boy odam Jeff Bezos ushbu haftada kompaniyaning millionta aksiyasini 3 milliard dollarga sotdi — bu uning ulushining 1,8 foizini tashkil etadi. “RBK”ning yozishicha, bu haqda AQSh Qimmatli qog‘ozlar va birjalar bo‘yicha komissiyasi (SEC) hujjatlariga tayanib CNBC xabar berdi.
OpenInsider kuzatuvlariga ko‘ra, Bezos Amazon aksiyalari 2950 dollardan 3075 dollargacha bo‘lgan paytda 7 ta bitim tuzgan.
SEC tomonidan taqdim etilgan hujjatlarga ko‘ra, savdolar AQSh insayderlik savdosi to‘g‘risidagi qonuniga muvofiq avvaldan rejalashtirilgan bo‘lgan. Ushbu tranzaksiyalarni hisobga olgan holda Bezos Amazon’ning qiymati qariyb 170 milliard dollarga teng 53 milliondan ortiq aksiyasiga egalik qiladi. Forbes 5-noyabr holatiga ko‘ra biznesmenning boyligini 190 milliard dollarga baholamoqda, bu esa Bezosning dunyodagi eng boy odam ekanligidan dalolat beradi.
2020-yilda Amazon rahbari kompaniya aksiyalarini uchinchi marta sotmoqda. Avgust oyida Bezos qimmatli qog‘ozlarni 3,1 milliard dollarga, fevralning birinchi haftasida esa 4 milliard dollarga sotgan. Bu bitimlardan so‘ng kompaniya rahbariga aksiyalarning 10,6 foiziga egalik qiladi.
2017-yilda Bezos o‘zining Blue Origin kosmik startapini moliyalashtirish uchun har yili bir milliard dollarlik Amazon aksiyalarini sotayotganini aytgandi. Bundan tashqari, Amazon rahbari 2020-yilning fevral oyida iqlim o‘zgarishi oqibatlariga qarshi kurashish uchun Bezos Earth Fund fondi ishga tushirilishini e’lon qildi. Xayriya jamg‘armasi uchun Bezos 10 milliard dollar ajratdi — mablag‘lar olimlar, faollar va tashkilotlarga beriladigan grantlarga sarflanadi.
Izoh (0)