Amazon асосчиси ва дунёдаги энг бой одам Жефф Безос ушбу ҳафтада компаниянинг миллионта акциясини 3 миллиард долларга сотди — бу унинг улушининг 1,8 фоизини ташкил этади. «РБК»нинг ёзишича, бу ҳақда АҚШ Қимматли қоғозлар ва биржалар бўйича комиссияси (SЕC) ҳужжатларига таяниб CNBC хабар берди.
ОpenInsider кузатувларига кўра, Безос Amazon акциялари 2950 доллардан 3075 долларгача бўлган пайтда 7 та битим тузган.
SЕC томонидан тақдим этилган ҳужжатларга кўра, савдолар АҚШ инсайдерлик савдоси тўғрисидаги қонунига мувофиқ аввалдан режалаштирилган бўлган. Ушбу транзакцияларни ҳисобга олган ҳолда Безос Amazon’нинг қиймати қарийб 170 миллиард долларга тенг 53 миллиондан ортиқ акциясига эгалик қилади. Forbes 5 ноябрь ҳолатига кўра бизнесменнинг бойлигини 190 миллиард долларга баҳоламоқда, бу эса Безоснинг дунёдаги энг бой одам эканлигидан далолат беради.
2020 йилда Amazon раҳбари компания акцияларини учинчи марта сотмоқда. Август ойида Безос қимматли қоғозларни 3,1 миллиард долларга, февралнинг биринчи ҳафтасида эса 4 миллиард долларга сотган. Бу битимлардан сўнг компания раҳбарига акцияларнинг 10,6 фоизига эгалик қилади.
2017 йилда Безос ўзининг Blue Origin космик стартапини молиялаштириш учун ҳар йили бир миллиард долларлик Amazon акцияларини сотаётганини айтганди. Бундан ташқари, Amazon раҳбари 2020 йилнинг февраль ойида иқлим ўзгариши оқибатларига қарши курашиш учун Bezos Earth Fund фонди ишга туширилишини эълон қилди. Хайрия жамғармаси учун Безос 10 миллиард доллар ажратди — маблағлар олимлар, фаоллар ва ташкилотларга бериладиган грантларга сарфланади.
Изоҳ (0)