Italiya hukumati koronavirus tarqalishi sababli mamlakatning butun hududida komendantlik soati joriy qildi. Mamlakat aholisining soat 22:00 dan 05:00 gacha uydan chiqishi taqiqlangan. Tegishli farmon Italiya bosh vaziri Juzeppe Konte tomonidan imzolandi. Bu haqda Meduza xabar berdi.
Shu bilan birga, mamlakatda muzeylar va ko‘rgazmalar yopiladi, maktablarning katta sinflari esa masofaviy ta’limga o‘tadi. Savdo markazlari dam olish kunlari ishlamaydi.
Mamlakat hududlari uch turdagi xavf darajasiga bo‘lingan — past, o‘rta va yuqori. O‘rta va yuqori xavf hududlarida qo‘shimcha cheklovlar amal qiladi, shu jumladan, ular o‘rtasidagi qatnovlarga ham cheklovlar qo‘yilgan.
Yangi cheklovlar 4-oktabrda amal qilishni boshlaydi va kamida bir oy davom etadi.
Italiyada koronavirus bilan kasallanishning keskin ortishi oktabr oyining ikkinchi yarmida boshlandi. Ikki hafta ichida koronavirus bilan kasallanish bo‘yicha kunlik ko‘rsatkich 10 mingtadan 30 mingtaga oshgan.
Avvalroq Italiya hukumati koronavirus bilan kasallanish holatlarining ortishi munosabati bilan yangi cheklov choralarini qabul qilishga majbur bo‘layotgani haqida xabar berilgandi.
Izoh (0)